اینٹی کرپشن وچ ڈیپوٹیشن اُتے تعیناتیاں بند ہونیاں چاہیدیاں نیں، چیف جسٹس
جعلی رجسٹریاں دے مقدمے وچ رجسٹری محرر تے رجسٹرار دیاں عبوری ضمانتاں مسترد
لاہور (کورٹ رپورٹر) چیف جسٹس لاہور ہائی کورٹ جسٹس عالیہ نیلم نے اینٹی کرپشن وچ 40 فیصد افسران دی ڈیپوٹیشن اُتے تقرری اُتے تشویش دا اظہار کردیاں آکھیا اے کہ اینٹی کرپشن وچ ڈیپوٹیشن دا سلسلہ بند ہونا چاہیدا اے، فیر ایہہ محکمہ ٹھیک ہووے گا۔
عدالت نے 6 جعلی رجسٹریاں دے مقدمے وچ رجسٹری محرر تاج محمد تے رجسٹرار محبوب علی دیاں عبوری ضمانتاں مسترد کر دتیاں۔
سماعت دوران چیف جسٹس عالیہ نیلم نے ریمارکس دِتے کہ ریکارڈ ویکھن نال جعلسازی نظر آندی اے تے ایہہ ملی بھگت نال ہوئی اے۔ اک غلط رجسٹری نال جائیداد دی مالیت کتھوں کتھے پہنچ جاندی اے۔ رجسٹریاں دے ڈھیر لگے ہوئے نیں، لوک خوار ہو رہے نیں، پر متعلقہ حکام دے کنّ اُتے جوں نہیں رینگدی۔
عدالتی حکم اُتے ڈی جی اینٹی کرپشن سہیل ظفر چٹھہ عدالت وچ پیش ہوئے تے دسیا کہ نویں رولز تیار کرکے چیف سیکرٹری پنجاب نوں بھیج دِتے گئے نیں۔
چیف جسٹس عالیہ نیلم نے پچھیا کہ اینٹی کرپشن وچ سپیشل پراسیکیوٹرز دی تعیناتی لئی کیہڑے اقدامات کیتے گئے نیں۔ ڈی جی اینٹی کرپشن نے دسیا کہ پراسیکیوشن لئی فوجداری وکیلاں دیاں خدمتاں حاصل کیتیاں جان گیاں۔
ایس اُتے چیف جسٹس نے ریمارکس دِتے کہ ڈیپوٹیشن اُتے آؤن والے افسران کیس خراب کر دیندے نیں۔ پراسیکیوشن وچ بھرتیاں لئی باقاعدہ اشتہار جاری ہونا چاہیدا اے۔
عدالت نے ڈی جی اینٹی کرپشن نوں نویں رولز وچ ترمیم بارے تجاویز اُتے دوبارہ غور کرن دی ہدایت وی کر دِتّی۔
