قومی اسمبلی: حکومت نوں کورم دے بحران دا سامنا، اپوزیشن نال لفظی جنگ

قومی اسمبلی وچ حکومت نوں کورم دے بحران دا سامنا، اپوزیشن نال لفظی جنگ

ایوان وچ فراہم کیتے گئے ٹیبلٹس تے انٹرنیٹ دی ہولی رفتار دا معاملہ وی چُکیا گیا

اسلام آباد (سید قیصر شاہ): قومی اسمبلی وچ حکومت تے اپوزیشن دے درمیان شکوے شکایتاں تے لفظی تلخی کارن اجلاس دا ماحول گرما گرم رہیا، جدکہ حکومتی ارکان دی غیر حاضری اُتے اپوزیشن نے کورم دی نشاندہی کر دِتی۔ مطلوبہ تعداد پوری نہ ہون کارن کارروائی معطل کرنی پئی۔

اجلاس وچ کورم پورا ہون توں بعد معمول دا ایجنڈا مکمل کیتا گیا، تاہم دوناں پاسیاں ولوں اک دوجے اُتے تنقید دا سلسلہ جاری رہیا۔

مولانا فضل الرحمٰن تے بیرسٹر گوہر نے گورنر راج، ایمرجنسی تے سیاسی انتقام دے معاملے اُتے حکومت نوں تنقید دا نشانہ بنایا، جس دے جواب وچ ڈاکٹر طارق فضل نے وی اظہارِ خیال کیتا۔ انہاں دی تقریر توں بعد اجلاس ملتوی کر دِتا گیا۔

اجلاس دوران ارکان دی آپس وچ گل بات دے نال ایوان وچ فراہم کیتے گئے ٹیبلٹس تے انٹرنیٹ دی ہولی رفتار دا معاملہ وی چُکیا گیا۔ ارکان نے سوال کیتا کہ جے انٹرنیٹ دی رفتار گھٹ ہووے تاں کاغذ توں بغیر پارلیمانی کارروائی کیویں ممکن ہووے گی؟