پارلیمنٹ لاجز وچ نہ سکیورٹی، نہ سہولتاں، ڈپٹی سپیکر دا اظہارِ برہمی
اسلام آباد (نامہ نگار) ڈپٹی سپیکر قومی اسمبلی سید غلام مصطفیٰ شاہ نے پارلیمنٹ لاجز وچ بنیادی سہولتاں تے سکیورٹی انتظامات دی غیر تسلی بخش صورتحال اُتے برہمی دا اظہار کردیاں متعلقہ حکام نوں مسئلے فوری حل کرن دی ہدایت دتی اے۔
ڈپٹی سپیکر دی زیرِ صدارت ہاؤس اینڈ لائبریری کمیٹی دے اجلاس وچ پارلیمنٹ لاجز دیاں سہولتاں، سکیورٹی، دیکھ بھال تے جاری ترقیاتی منصوبیاں دا جائزہ لیا گیا۔
اجلاس وچ کمیٹی دے ارکان نے ڈینگی سپرے نہ ہون، سی سی ٹی وی کیمریاں خراب ہون، نگرانی دے نظام دی ناقص کارکردگی، فائر سیفٹی انتظامات دی عدم موجودگی تے لفٹاں خراب ہون اُتے تشویش دا اظہار کیتا۔
لاجز دی ڈسپنسری وچ ہنگامی طبی امداد لئی ضروری ادویات تے طبی آلات دی کمی دا معاملہ وی چکیا گیا۔
ڈپٹی سپیکر نے وزارتِ داخلہ نوں سکیورٹی بہتر بناؤن، وزارتِ صحت نوں ڈسپنسری وچ ضروری ادویات، طبی آلات تے ہنگامی طبی سہولتاں دی دستیابی یقینی بناؤن دی ہدایت دتی۔
اوہناں سی ڈی اے نوں سی سی ٹی وی کیمریاں نوں فعال کرن تے نگرانی دا نظام بہتر بناؤن لئی فوری اقدامات کرن دا وی آکھیا۔
اجلاس وچ پارلیمنٹ لاجز دے نال واقع 104 اضافی فیملی سوٹس دی تعمیر دا جائزہ وی لیا گیا۔ ڈپٹی سپیکر نے متعلقہ حکام نوں تعمیراتی کم تیز کرکے منصوبہ مقررہ وقت اُتے مکمل کرن دی ہدایت دتی۔
