علما تے مذہبی رہنماواں دا اجلاس، خودکش حملیاں خلاف فتوے دی توثیق
ریاست خلاف مسلح کارروائیاں ناجائز، خودکش حملے حرام، مشترکہ اجلاس دا اعلامیہ
بلوچستان دی ترقی لئی امن ناگزیر، اجلاس وچ فیلڈ مارشل نوں خراجِ تحسین پیش کیتا گیا
کوئٹہ (اے پی پی) چیئرمین پاکستان علما کونسل حافظ طاہر محمود اشرفی دی صدارت وچ قومی پیغامِ امن کمیٹی تے صوبائی پیغامِ امن کمیٹی دے اہتمام نال علما و مشائخ تے مختلف مذاہب دے رہنماواں دا مشترکہ اجلاس بدھ دے روز ہویا۔
اجلاس وچ مولانا علی محمد ابو تراب، ڈاکٹر آصف میر، مفتی یوسف کشمیری، مولانا سید سمیع اللہ آغا، مولانا قاسم حقانی، علامہ نصر اللہ حسینی، مفتی محمد جان قاسمی، مولانا حزب اللہ عثمانی، مولانا سمیع اللہ اعوان، مولانا عبدالرحمن، مولانا عبداللہ حقانی، مفتی عمر فاروق، مولانا عبدالرحمان سلفی، پاسٹر سائمن بشیر، سردار جسبیر سنگھ تے ہور علما، مشائخ تے مختلف مذاہب دے رہنما شریک ہوئے۔
متفقہ اعلامیے وچ خودکش حملیاں، دہشت گردی، انتہا پسندی تے بے گناہ انساناں دے قتل خلاف متفقہ فتوے دی توثیق کیتی گئی تے پیغامِ پاکستان دے قومی بیانیے دی مکمل حمایت دا اعلان کیتا گیا۔
اعلامیے وچ آکھیا گیا کہ خودکش حملے حرام نیں، بے گناہ انساناں دا قتل ناجائز اے تے دہشت گردی اسلام سمیت سارے مذاہب دیاں بنیادی تعلیمات دے خلاف اے۔
کسی وی فرد، گروہ یا تنظیم نوں مذہب، مسلک یا کسے نظریے دے ناں اُتے قتل و غارت گری، ریاست خلاف مسلح کارروائیاں یا قانون اپنے ہتھ وچ لین دا حق حاصل نہیں۔
اعلامیے وچ فتنۂ خوارج تے فتنۂ ہندوستان خلاف افواجِ پاکستان تے قومی سلامتی دے اداریاں دی جدوجہد دی مکمل تائید تے حمایت کیتی گئی۔
ملک دی ترقی لئی بلوچستان وچ امن نوں ناگزیر قرار دیندیاں آکھیا گیا کہ کسے نوں وی مذہب یا مسلک دی آڑ وچ بلوچستان دا امن تباہ کرن دی اجازت نہیں دِتی جا سکدی۔
نوجوان نسل نوں انتہا پسندانہ نظریات، نفرت انگیز پروپیگنڈے تے دہشت گرد تنظیموں دے اثرات توں محفوظ رکھن لئی علما و مشائخ، مذہبی رہنما، استاد تے سماجی شخصیات رَل کے اپنا کردار ادا کرن گے۔
اجلاس وچ اک متفقہ قرارداد دے ذریعے فیلڈ مارشل سید عاصم منیر دیاں عالمِ اسلام دے اتحاد، امتِ مسلمہ دی یکجہتی، علاقائی استحکام تے عالمی امن لئی کوششاں تے خدمات نوں خراجِ تحسین پیش کیتا گیا۔
