پاکستان تے کویت دا دوطرفہ بحری تعاون ہور مضبوط بناؤن دا عزم
امیر البحر نال کویتی ہم منصب دی ملاقات، بحری سکیورٹی دی صورتحال اُتے تبادلۂ خیال
کویتی بحریہ دے کمانڈر دا دورہ دوطرفہ برادرانہ تعلقات دا عکاس اے: آئی ایس پی آر
اسلام آباد (خصوصی نیوز رپورٹر) کویت نیول فورس دے کمانڈر میجر جنرل (نیوی) سیف عبدالہادی الحملان نے نیول ہیڈکوارٹرز اسلام آباد وچ سربراہ پاک بحریہ ایڈمرل نوید اشرف نال ملاقات کیتی۔
آئی ایس پی آر دے مطابق نیول ہیڈکوارٹرز پہنچن اُتے کویتی بحریہ دے کمانڈر نوں پاک بحریہ دے چاق و چوبند دستے ولوں گارڈ آف آنر پیش کیتا گیا۔
ملاقات دوران باہمی دلچسپی دے معاملے، خطے دی بحری سکیورٹی دی صورتحال تے دوناں ملکاں دیاں بحری فوجاں دے درمیان تعاون نوں ہور مضبوط بناؤن اُتے تبادلۂ خیال کیتا گیا۔
آئی ایس پی آر دے مطابق ایہ دورہ پاکستان تے کویت دے دیرینہ برادرانہ تعلقات تے خطے وچ بحری امن تے استحکام لئی دوناں ملکاں دے مشترکہ عزم دا عکاس اے۔
دونیں ملکاں نے علاقائی بحری امن تے استحکام لئی اپنے مشترکہ عزم دا اعادہ کیتا۔ کویتی بحریہ دے کمانڈر دا ایہ دورہ دوناں ملکاں دے درمیان دیرینہ برادرانہ تعلقات دی عکاسی کردا اے۔
