شوکاز صرف اکھاں دا دھوکا اے: ہائیکورٹ، پولیس دی غلط رپورٹ اُتے برہمی
مدعی رقم لے کے بیرونِ ملک وی جا چکیا، ملزم ہُن تک پھسیا ہویا اے، نظام ٹھیک کیویں ہووے گا؟ وعدے نہیں، عملی کم کرو: چیف جسٹس
سی پی او ملتان توں رپورٹ طلب
لاہور (کورٹ رپورٹر) لاہور ہائیکورٹ وچ 20 لاکھ روپے دے جعلی چیک دے مقدمے دے اخراج دی درخواست اُتے سماعت دوران چیف جسٹس عالیہ نیلم پولیس دی کارکردگی اُتے برہم ہو گئیاں۔ عدالت نے سی پی او ملتان توں اک مہینے وچ پیش رفت دی رپورٹ طلب کردیاں پولیس دی غلط رپورٹنگ تے ناقص کارکردگی اُتے سخت برہمی دا اظہار کیتا۔
چیف جسٹس لاہور ہائیکورٹ عالیہ نیلم نے شہری شہباز نور دی درخواست اُتے سماعت کیتی۔ عدالتی حکم اُتے سی پی او ملتان پیش ہوئے تاں چیف جسٹس نے پچھیا کہ کی تساں ایہ کیس ویکھیا اے؟ اپنے محکمے دی کارکردگی بارے کی آکھو گے؟ تہاڈی رپورٹ دے مطابق ملزم اشتہاری اے، جدکہ ملزم دا مدعی نال راضی نامہ ہو چکیا اے تے اوہدی ضمانت وی کنفرم ہو چکی اے۔
پولیس اہلکار فائل نہیں ویکھدے؟ عدالت وچ غلط رپورٹ کیویں جمع کرائی گئی؟ چیف جسٹس نے ریمارکس دتے کہ شوکاز نوٹس اکھاں دا دھوکا اے، اسیں کسے دھوکے وچ نہیں آواں گے۔ ایس طرح دے شوکاز نوٹس جاری نہ کریا کرو، کیوں جو اک مہینے بعد شوکاز نوٹس تے معطلی دے احکامات واپس لے لَئے جاندے نیں۔
کیہڑا وی مقدمہ ہووے، جے پولیس نوں بلا لیا جاوے تاں کارروائی صرف اوہدے اُتے ہی ہووے گی؟ ایہ 2018ء دا مقدمہ اے، مدعی رقم لے کے پاکستان توں وی جا چکیا اے، جدکہ ملزم ہُن تک مقدمے وچ پھسیا ہویا اے۔ ایہ کی ہو رہیا اے تے نظام ٹھیک کیویں ہووے گا؟
چیف جسٹس نے آکھیا کہ ساڈے جج 2021ء دے مقدمے نمٹا چکے نیں، پر تساں دوبارہ چالان جمع کراؤ گے تاں پرانا مقدمہ فیر نظام وچ آ جاوے گا۔ تہاڈی دلچسپی اختیارات استعمال کرن توں علاوہ کسے ہور کم وچ نظر نہیں آندی۔ کم وچ وعدے نہیں، صرف عملی کم ہونا چاہیدا اے۔
سماعت دوران سی پی او ملتان نے عدالت نوں یقین دہانی کرائی کہ آئندہ ایہو جیہا نہیں ہووے گا۔ عدالت نے مقدمے بارے اک مہینے وچ پیش رفت دی رپورٹ جمع کراؤن دا حکم دے دتا۔
