گندم دی قیمت 4500 روپے فی من مقرر کرن دا فیصلہ، کساناں لئی اہم پیش رفت، پنجاب دی تاریخ وچ پہلی واری کساناں نوں 50 ہزار ٹریکٹر مل رہے نیں: وزیر اطلاعات

لاہور (سٹاف رپورٹر) وزیر اطلاعات و ثقافت پنجاب عظمیٰ بخاری نے آکھیا اے کہ وزیراعلیٰ پنجاب مریم نواز دے کسان دوست اقدامات دے ذریعے صوبے وچ زرعی ترقی لئی عملی قدم چُکے جا رہے نیں۔ کسان بینک دے قیام دا اعلان کساناں دا دیرینہ مطالبہ سی، جس نوں پورا کیتا جا رہیا اے۔ وزیراعلیٰ نے کساناں دے دیرینہ مطالبے اُتے گندم دی امدادی قیمت 4500 روپے فی من مقرر کیتی اے۔

اپنے جاری بیان وچ عظمیٰ بخاری نے مزید آکھیا کہ پنجاب دی تاریخ وچ پہلی واری کساناں نوں 50 ہزار ٹریکٹر فراہم کیتے جا رہے نیں، جدکہ کسان کارڈ دے ذریعے براہ راست 10 لاکھ کسان مستفید ہو رہے نیں۔ مریم نواز نے کساناں اُتے اعتماد کیتا، جس دا اظہار کسان کارڈ دے تحت سو فیصد ریکوری توں ہوندا اے۔ نوجواناں نوں لیپ ٹاپ تے سکالرشپس فراہم کیتے جا رہے نیں، جدکہ کساناں نوں ٹریکٹر، سپر سیڈر تے کسان کارڈ دی سہولت دتی جا رہی اے۔

عظمیٰ بخاری نے آکھیا کہ ایہہ مریم نواز دا پنجاب اے، اک بدلدا تے ترقی کردا پنجاب۔ ہن صوبے وچ منصوبے تے ریلیف پیکجز محض فائلز تے سوشل میڈیا تک محدود نہیں، بلکہ انہاں دے ثمرات زمینی سطح اُتے پہنچدے نظر آ رہے نیں۔