حکومت سندھ چینی سرمایہ کاری دے فروغ لئی پُرعزم: مراد علی شاہ
چینی قونصل جنرل نال ملاقات، جمہوریہ ترکیہ دے اعلان دی 103ویں سالگرہ اُتے مبارکباد
کراچی (سٹاف رپورٹر) وزیراعلیٰ سندھ سید مراد علی شاہ تے چین دے قونصل جنرل فینگ ڈیہینگ نے ملاقات دوران دوطرفہ تعاون، سرمایہ کاری دے مواقع، جدید ٹیکنالوجی، زراعت، شہری سلامتی تے سندھ وچ بنیادی ڈھانچے دی ترقی نال متعلق امور اُتے تبادلہ خیال کیتا۔
وزیراعلیٰ ہاؤس وچ ہون والی ملاقات دوران خصوصی طور اُتے انہاں حکومتی معاہدیاں نوں حتمی شکل دین اُتے توجہ دتی گئی، جنہاں اُتے وزیراعلیٰ دے حالیہ دورۂ چین دوران سندھ حکومت نے چینی کمپنیوں نال دستخط کیتے سن۔ ملاقات وچ وزیراعلیٰ دے معاون خصوصی سید قاسم نوید تے پرنسپل سیکریٹری آغا واصف نے وی شرکت کیتی۔
چین دے قونصل جنرل نے شنگھائی سرمایہ کاری کانفرنس دے کامیاب انعقاد اُتے وزیراعلیٰ نوں مبارکباد دتی۔ انہاں آکھیا کہ کانفرنس وچ 400 سرمایہ کاراں دی شرکت سندھ حکومت اُتے انہاں دے اعتماد دی عکاسی کردی اے۔ مراد علی شاہ نے آکھیا کہ سندھ حکومت چینی سرمایہ کاراں نال تعاون مضبوط بناؤن تے مختلف شعبیاں وچ سرمایہ کاری دے فروغ لئی پُرعزم اے۔ کراچی سیف سٹی منصوبے دے دوجے مرحلے لئی ہواوے نال مذاکرات نوں حتمی شکل دتی جا رہی اے۔
انہاں اس خواہش دا اظہار کیتا کہ منصوبے اُتے جلد کم شروع کیتا جائے، کیوں جو کراچی ورگے وڈے شہر لئی جدید سکیورٹی نظام ضروری اے۔ سندھ حکومت دا مقصد کراچی وچ سکیورٹی تے نگرانی نوں مضبوط بناؤن لئی جدید ترین سیف سٹی نظام قائم کرنا اے، جس وچ اک جدید کمانڈ اینڈ کنٹرول سینٹر وی شامل ہووے گا۔
وزیراعلیٰ نے آکھیا کہ سندھ وچ سورج مکھی تے گندم دی پیداوار ودھاؤن لئی چینی ٹیکنالوجی حاصل کرن بارے وی گل بات ہوئی اے۔ صوبائی حکومت زرعی پیداوار بہتر بناؤن تے شعبہ زراعت دی ترقی لئی چین دی تکنیکی مہارت توں فائدہ چکنا چاہندی اے۔
بنیادی ڈھانچے دی ترقی بارے گل کردے ہوئے وزیراعلیٰ نے آکھیا کہ سندھ حکومت موسم سرما دوران سکھر بیراج دے باقی رہندے گیٹس نصب کرنا چاہندی اے۔ حکومت سکھر بیراج تے اوتھوں نکلن والیاں نہراں لئی 100 گیٹس دی تنصیب دا کم تیز کرن دا ارادہ رکھدی اے۔
وزیراعلیٰ نے آکھیا کہ چین دے شہر ییچانگ نال سکھر دے سسٹر سٹی تعلقات قائم کرن بارے وی گل بات ہوئی اے۔ سسٹر سٹی معاہدے نال دوناں شہراں دیاں جامعات، ہسپتالاں تے ہور اداریاں دے درمیان تعاون دے مواقع پیدا ہون گے، جس نال علم تے تجربات دے تبادلے تے مشترکہ اقدامات دی راہ ہموار ہووے گی۔
وزیراعلیٰ تے چین دے قونصل جنرل نے دوطرفہ تعاون مضبوط بناؤن تے معاہدیاں اُتے عمل درآمد وچ سہولت فراہم کرن لئی مختلف شعبیاں وچ ورکنگ گروپس قائم کرن اُتے اتفاق کیتا۔ مراد علی شاہ نے آکھیا کہ ورکنگ گروپس دی تشکیل نال مؤثر رابطہ کاری یقینی بناؤن تے ملاقات وچ زیر بحث مختلف اقدامات اُتے پیش رفت تیز کرن وچ مدد ملے گی۔
ملاقات وچ سندھ حکومت تے چینی فریق نے سرمایہ کاری، ٹیکنالوجی، زراعت، شہری سلامتی تے بنیادی ڈھانچے دی ترقی دے شعبیاں وچ تعاون مزید ودھاؤن دے عزم دا اعادہ کیتا۔
علاوہ ازیں جمہوریہ ترکیہ دے اعلان دی 103ویں سالگرہ دے سلسلے وچ منعقدہ تقریب نال خطاب کردے ہوئے وزیراعلیٰ مراد علی شاہ نے ترکیہ نال دوطرفہ تعلقات مضبوط بناؤن لئی سندھ حکومت دے عزم دا اعادہ کیتا۔ انہاں خصوصی طور اُتے تجارت، سرمایہ کاری، بنیادی ڈھانچے، تعلیم، ٹیکنالوجی تے ثقافتی تبادلے دے شعبیاں وچ تعاون ودھاؤن اُتے زور دتا۔
وزیراعلیٰ نے سندھ حکومت تے عوام دی طرفوں ترک حکومت تے عوام نوں دلی مبارکباد پیش کیتی۔ انہاں پاکستان تے ترکیہ دے تعلقات نوں بھائی چارے دا تاریخی رشتہ قرار دتا، جس دیاں بنیاداں مشترکہ قدراں، باہمی احترام، ثقافتی ہم آہنگی تے دوناں ملکاں دے درمیان دیرینہ دوستی اُتے قائم نیں۔
وزیراعلیٰ نے آکھیا کہ پاکستان تے ترکیہ دی دوستی روایتی سفارتی تعلقات توں کہیں ودھ کے اے۔ ایہہ تعلق دوناں ملکاں دے عوام دی مخلصانہ محبت تے ضرورت دے وقت اک دوجے دا ساتھ دین دے مشترکہ عزم نال مضبوط ہوندا اے۔ انہاں زور دتا کہ حقیقی دوستی صرف لفظاں نال نہیں بلکہ عملی اقدامات نال ثابت ہوندی اے۔
انہاں آکھیا کہ عالمی اقتصادی منظرنامے وچ تبدیلیاں پاکستان تے ترکیہ لئی مشترکہ منصوبیاں، سرمایہ کاری وچ سہولت، ٹیکنالوجی دی منتقلی تے علم و تجربات دے تبادلے دے ذریعے اپنی اقتصادی شراکت داری مضبوط بناؤن دے نویں مواقع فراہم کر رہیاں نیں۔
وزیراعلیٰ سندھ نے ترک کاروباری اداریاں، سرمایہ کاراں تے اداریاں نوں سندھ وچ موجود مواقع دا جائزہ لین تے مقامی شراکت داراں نال طویل مدتی شراکت داریاں قائم کرن دی دعوت دتی۔
