ملکی منڈیاں وچ قیمتیں مستحکم رکھنا پہلی ترجیح اے: نائب وزیراعظم، پاکستان دے قومی مفادات لئی مسلسل سفارتی رابطے ضروری: اجلاس وچ گفتگو

اسلام آباد (وقائع نگار) نائب وزیراعظم تے وزیر خارجہ سینیٹر محمد اسحاق ڈار دی صدارت وچ فاضل چینی دی برآمد بارے کابینہ کمیٹی دا اجلاس ہویا، جس وچ چینی دی برآمد لئی پالیسی دے رہنما اصولاں نوں حتمی شکل دے دتی گئی۔

ترجمان دفتر خارجہ دے مطابق کمیٹی نے آئندہ کرشنگ سیزن تک چینی دے حتمی ذخیرے دی صورتحال دا جامع جائزہ لیا۔ اس دا مقصد فاضل چینی دی مجموعی مقدار دا درست اندازہ لاؤن دے نال ملک بھر وچ مقامی استعمال لئی چینی دے وافر ذخیرے دی دستیابی یقینی بنانا سی۔

نائب وزیراعظم تے وزیر خارجہ نے مقامی صارفین دے تحفظ بارے وزیراعظم دیاں ہدایات تے زور دیندے ہوئے آکھیا کہ چینی دی برآمد وچ سہولت دین دا مقصد مقامی کساناں دی معاونت، چینی دی صنعت نوں مضبوط بنانا تے زرمبادلہ دے ذخائراں وچ اضافہ کرنا اے، تاہم ملکی منڈیاں وچ قیمتاں دا استحکام برقرار رکھنا پہلی ترجیح اے۔

انہاں نے متعلقہ حکام نوں ہدایت کیتی کہ چینی دی برآمد دوران سپلائی چین نوں ہموار رکھن تے مارکیٹ وچ کسے وی قسم دے بگاڑ نوں روکنے لئی مؤثر نگرانی دا نظام نافذ کیتا جائے۔

دوجے پاسے پاکستان دی خارجہ پالیسی دیاں ترجیحات تے جاری سفارتی سرگرمیاں دا جائزہ لین لئی اجلاس دی صدارت کردیاں اسحاق ڈار نے پاکستان دے قومی مفادات دے فروغ لئی مسلسل سفارتی رابطیاں دی اہمیت تے زور دتا۔ انہاں متعلقہ افسران نوں قریبی رابطہ کاری برقرار رکھن تے اہم ترجیحات تے بروقت پیش رفت یقینی بناؤن دی ہدایت وی کیتی۔

اجلاس وچ اہم علاقائی تے عالمی پیش رفت، آئندہ اعلیٰ سطح دے سفارتی رابطیاں تے دوطرفہ تے کثیرالجہتی تعاون نوں مزید مضبوط بناؤن دیاں کوششاں بارے تبادلہ خیال کیتا گیا۔