سعودی سفیر دی وزیر خزانہ محمد اورنگزیب نال ملاقات، معدنیات وچ سرمایہ کاری تے گفتگو، مصدق ملک نال ملاقات وچ صنعت، توانائی تے ٹیکنالوجی دے شعبیاں وچ تعاون ودھاؤن تے تبادلہ خیال

اسلام آباد (دنیا نیوز) سعودی عرب دے سفیر ڈاکٹر راجح تامی البقمی نے گزشتہ روز وفاقی وزیر خزانہ سینیٹر محمد اورنگزیب تے وفاقی وزیر ڈاکٹر مصدق مسعود ملک نال وکھ وکھ ملاقاتاں کیتیاں، جنہاں وچ مختلف شعبیاں وچ دوطرفہ تعاون ودھاؤن تے اتفاق کیتا گیا۔

سینیٹر محمد اورنگزیب نال ملاقات وچ پاکستان تے سعودی عرب دے درمیان معاشی تعاون، تجارت، سرمایہ کاری ودھاؤن تے دوطرفہ تعلقات نوں ہور مضبوط بناؤن تے اتفاق ہویا۔

وزارت خزانہ دے اعلامیے مطابق وزیر خزانہ نے پاکستان لئی سعودی عرب دی مسلسل معاونت تے شکریہ ادا کردیاں آکھیا کہ دوناں ملکاں دے تاریخی تعلقات سانجھے مذہب، تاریخ، باہمی اعتماد تے احترام تے قائم نیں۔

ملاقات وچ پاکستان تے سعودی عرب دی دیرینہ دوستی تے برادرانہ تعلقات نوں ہور مضبوط بناؤن تے وی زور دتا گیا، جدکہ زراعت، معدنیات تے کان کنی سمیت ہور اہم شعبیاں وچ سرمایہ کاری دے مواقع بارے گفتگو ہوئی۔ فریقین نے علاقائی صورتحال تے جاری تنازعات بارے وی تبادلہ خیال کیتا۔

دریں اثنا وفاقی وزیر ڈاکٹر مصدق مسعود ملک نال وی سعودی سفیر نے ملاقات کیتی، جس وچ پاکستان تے سعودی عرب دے درمیان صنعت، توانائی، ٹیکنالوجی تے کاروباری ترقی دے شعبیاں وچ تعاون ودھاؤن تے اتفاق کیتا گیا۔