خیبرپختونخوا، انسانی حقوق دیاں شکایتاں لئی سانجھا ڈیجیٹل پورٹل بناؤن دا فیصلہ

پشاور خیبرپختونخوا حکومت نے انسانی حقوق نال متعلقہ اداریاں وچ رابطہ کاری بہتر بناؤن تے شکایتاں دے مؤثر ازالے لئی سانجھا ڈیجیٹل پورٹل قائم کرن دا فیصلہ کیتا اے، جس دے ذریعے شکایتاں وصول کرن، متعلقہ اداریاں نوں بھیجن تے انہاں اُتے ہون والی پیش رفت دی نگرانی کیتی جائے گی۔

مشیرِ اطلاعات تے تعلقاتِ عامہ خیبرپختونخوا ثمر ہارون بلور نے دسیا کہ مجوزہ پورٹل دے ذریعے شکایتاں دے حل وچ تاخیر تے مختلف اداریاں ولوں اکّو جیہے کم وچ دہرائی نوں گھٹاؤن وچ مدد ملے گی۔

ایس مقصد لئی موجودہ اداریاں نوں سانجھے ڈیجیٹل نظام نال جوڑیا جائے گا تے کوئی نواں متوازی ادارہ قائم نہیں کیتا جائے گا۔ سارے متعلقہ ادارے اپنے قانونی دائرہ اختیار وچ رہندے ہوئے کم جاری رکھن گے۔

محکمہ سماجی بہبود، پولیس، محتسبین تے انسانی حقوق نال متعلق ہور اداریاں نوں وی ایس نظام دا حصہ بنایا جائے گا۔

مجوزہ طریقہ کار دے تحت ہر ضلع وچ ایڈیشنل ڈپٹی کمشنر انسانی حقوق نال متعلقہ معاملات تے شکایتاں متعلقہ اداریاں کول بھیجے گا، جدکہ ڈسٹرکٹ پولیس آفیسر دے دفتر وچ انسانی حقوق بارے ہیلپ ڈیسک قائم کرن دی تجویز وی زیرِ غور اے۔