شہریاں نال 15 ارب دا فراڈ، نیب نوں تحقیقات دی ہدایت

سندھ ہائیکورٹ نے دو ہفتیاں وچ تحقیقات دی پیشرفت بارے رپورٹ طلب کر لئی، ڈی جی نیب عدالت وچ پیش، درخواست گزاراں نوں ثبوت نیب دے حوالے کرن دا حکم۔

کراچی (سٹاف رپورٹر) سندھ ہائیکورٹ دے آئینی بینچ نے سرمایہ کاری دے ناں اُتے اک ہزار توں ودھ شہریاں نال 15 ارب روپے توں ودھ دے مبینہ فراڈ دے معاملے وچ نیب نوں تحقیقات دی ہدایت کر دتی اے۔ عدالت نے نیب حکام دے خلاف توہینِ عدالت دی درخواست اُتے سماعت کردیاں دو ہفتیاں وچ تحقیقات دی پیشرفت بارے رپورٹ طلب کر لئی۔

عدالتی احکامات اُتے ڈی جی نیب کراچی عدالت وچ پیش ہوئے۔ نیب پراسیکیوٹر صدف راجپوت نے مؤقف اختیار کیتا کہ نیب قانوناں دے تحت ایہ کیس ادارے دے دائرہ اختیار وچ نہیں آندا، ایس لئی ایہ ایف آئی اے نوں منتقل کیتا گیا سی، تاہم عدالت حکم دےوے تے نیب تحقیقات لئی تیار اے۔

درخواست گزار اظہر میمن نے مؤقف اختیار کیتا کہ سرمایہ کاری دے ناں اُتے اک ہزار توں ودھ شہریاں نال 15 ارب روپے توں ودھ دا فراڈ کیتا گیا، تاہم نیب نے مبینہ فراڈ دی رقم دا تخمینہ گھٹ لا کے تحقیقات ایف آئی اے نوں منتقل کر دتیاں۔

عدالت نے درخواست گزاراں نوں سارے ثبوت نیب نوں فراہم کرن دا حکم دیندے ہوئے سماعت دو ہفتیاں لئی ملتوی کر دتی۔