سہیل آفریدی ہی خیبر پختونخوا دے وزیراعلیٰ رہن گے: پی ٹی آئی
عمران خان توں علاوہ کسے نوں متبادل وزیراعلیٰ نامزد کرن یا فیصلہ کرن دا اختیار نہیں: نوٹیفکیشن
چیئرمین بیرسٹر گوہر دی تمام پارٹی ارکان تے عہدیداراں نوں نوٹیفکیشن اُتے عملدرآمد دی ہدایت
اسلام آباد (دنیا نیوز، مانیٹرنگ ڈیسک) پاکستان تحریک انصاف دے چیئرمین بیرسٹر گوہر علی خان نے خیبر پختونخوا دے وزیراعلیٰ محمد سہیل آفریدی بارے نوٹیفکیشن جاری کر دتا اے، جس وچ پی ٹی آئی رہنماؤں تے عہدیداراں نوں وزیراعلیٰ دی تبدیلی دا کوئی ایجنڈا پیش کرن توں روک دتا گیا اے۔
جاری کیتے گئے نوٹیفکیشن وچ آکھیا گیا اے کہ بانی پی ٹی آئی دے اعتماد تے حمایت نال سہیل آفریدی ہی خیبر پختونخوا دے وزیراعلیٰ نیں تے رہن گے۔ وزیراعلیٰ خیبر پختونخوا دی نامزدگی یا تبدیلی بارے اجلاس بلاؤن اُتے پابندی لا دتی گئی اے۔
نوٹیفکیشن وچ مزید آکھیا گیا اے کہ وزیراعلیٰ خیبر پختونخوا دی نامزدگی یا تبدیلی بارے کسے وی تجویز یا بحث دی اجازت نہیں ہووے گی۔ بانی پی ٹی آئی عمران خان توں علاوہ کسے نوں متبادل وزیراعلیٰ نامزد کرن یا فیصلہ تبدیل کرن دا اختیار حاصل نہیں۔
خیبر پختونخوا دے وزیراعلیٰ بارے بانی پی ٹی آئی دے فیصلے پارٹی دے سارے ارکان لئی حتمی تے پابند ہون گے۔ تحریک انصاف دے تمام ارکان تے عہدیداراں نوں نوٹیفکیشن اُتے عملدرآمد دی ہدایت وی کیتی گئی اے۔
