سمارٹ سیف سٹیز: 337 نویاں نوکریاں دین دی منظوری
سمارٹ سیف سٹیز منصوبے نوں چلاؤن لئی 96 کروڑ 68 لاکھ روپے منگ لیے گئے
لاہور (کرائم رپورٹر) پنجاب حکومت نے سمارٹ سیف سٹیز منصوبے دے دوجے مرحلے وچ 337 نویاں نوکریاں دین دی منظوری دے دتی اے۔ منصوبے دے دوجے مرحلے لئی مجموعی طور اُتے اک ارب 48 کروڑ 93 لاکھ روپے دے فنڈز دی لوڑ ہووے گی۔
ذرائع دے مطابق سمارٹ سیف سٹیز منصوبے لئی نویاں اسامیاں تے سالانہ آپریشنل اخراجات دی مد وچ فنڈز فراہم کرن دا معاملہ صوبائی کابینہ دے سامنے پیش کر دتا گیا اے۔
منصوبے وچ 337 نویاں اسامیاں لئی 52 کروڑ 25 لاکھ اک ہزار روپے مختص کرن دی تجویز دتی گئی اے، جدکہ منصوبے نوں چلاؤن دے اخراجات پورے کرن لئی 96 کروڑ 68 لاکھ 51 ہزار روپے منگے گئے نیں۔
مالی سال 2026-27 دوران منصوبے دے دوجے مرحلے دے اخراجات پورے کیتے جان گے۔
آئی جی پنجاب نے سمارٹ سیف سٹیز منصوبے دے دوجے مرحلے وچ بھرتیاں تے فنڈز دی فراہمی لئی وزیراعلیٰ پنجاب نوں سمری بھجوائی سی۔
منصوبے دے تحت نویاں اسامیاں اُتے بھرتیاں تے آپریشنل اخراجات لئی فنڈز دی فراہمی بارے اقدامات کیتے جان گے۔
