ایمان مزاری تے ہادی چٹھہ نوں 13،13 سال قید، 4 لاکھ روپے جرمانہ

عدالت ولوں دفعہ 382 بی دا فائدہ دین کارن ملزمان 10 سال قید دی سزا بھگتن گے۔

اسلام آباد (اپنے نامہ نگار توں) انسدادِ دہشت گردی عدالت دے جج طاہر عباس سپرا نے بیریئر ہٹاؤن تے سرکاری کم وچ مداخلت دے کیس وچ جرم ثابت ہون اُتے ایمان مزاری تے ہادی علی چٹھہ نوں مجموعی طور اُتے 13، 13 سال قید تے 2، 2 لاکھ روپے جرمانے دی سزا سنا دتی۔ عدالت دے مطابق ساریاں سزواں اکٹھیاں شروع ہون گیاں۔

گزشتہ روز اڈیالہ جیل وچ سماعت دوران ایمان مزاری تے ہادی علی چٹھہ دے علاوہ پراسیکیوٹر راجہ نوید نے وی اپنے حتمی دلائل مکمل کیتے۔

سماعت دوران وکیل صفائی نے تحریری درخواست دتی کہ جدوں تک سپریم کورٹ تے ہائی کورٹ وچ درخواستاں زیرِ التوا نیں، اوہدوں تک فیصلہ ملتوی کیتا جائے۔

دونواں پاسیاں دے دلائل مکمل ہون اُتے عدالت نے سماعت وچ وقفہ کر دتا۔ بعد وچ فیصلہ سناندے ہوئے عدالت نے دہشت گردی دی دفعہ تحت 10، 10 سال قید تے 1، 1 لاکھ روپے جرمانے، دفعہ 353 تحت 2، 2 سال قید تے 50، 50 ہزار روپے جرمانے، جدکہ دفعہ 186 تحت 1، 1 سال قید تے 50، 50 ہزار روپے جرمانے دی سزا سنائی۔

عدالت نے ملزمان نوں دفعہ 382 بی دا فائدہ وی دتا، جس دے باعث ملزمان نوں 10 سال قید دی سزا بھگتنا پئے گی۔

بعد وچ عدالت نے تحریری فیصلہ وی جاری کر دتا۔ واضح رہے کہ ایمان مزاری تے ہادی علی چٹھہ خلاف 25 اکتوبر 2024 نوں مقدمہ درج کیتا گیا سی۔