چونڈاں وچ اصلاحات لئی کمیٹی: حکومت تے اپوزیشن کولوں ناں منگوا لَئے، سپیکر دا شہباز شریف، یوسف گیلانی تے محمود اچکزئی نوں خط
وزیراعظم نوں قائدِ ایوان دے طور تے 15 ارکان، چیئرمین سینیٹ نوں 10 سینیٹرز تے قومی اسمبلی دے اپوزیشن لیڈر نوں 5 ارکان دے ناں بھیجن دی درخواست، ناں ملدے ای کمیٹی دا نوٹیفکیشن جاری کر دتا جائے گا
انتخابی اصلاحات کسے اک جماعت دا نہیں بلکہ سانجھا قومی معاملہ اے: طارق فضل، تہاڈے 15 تے ساڈے 5 ارکان، ایس طرح بیٹھن نالوں نہ بیٹھنا بہتر اے: گوہر، پیپلز پارٹی ولوں اپوزیشن نوں کمیٹی وچ شامل ہون دی باقاعدہ دعوت
اسلام آباد (وقائع نگار، نیوز ایجنسیاں، مانیٹرنگ ڈیسک) وفاقی حکومت نے انتخابی اصلاحات لئی 30 رکنی پارلیمانی کمیٹی دی تشکیل دا عمل شروع کر دتا اے، جدوں کہ آئندہ انتخابات نوں شفاف تے قابلِ اعتماد بناؤن لئی اپوزیشن نوں اعتماد وچ لین تے پارلیمانی سطح تے اتفاقِ رائے پیدا کرن دیاں کوششاں وی تیز کر دتیاں گئیاں نیں۔
دوجے پاسے سپیکر قومی اسمبلی ایاز صادق نے انتخابی اصلاحات کمیٹی دے معاملے تے وزیراعظم شہباز شریف، چیئرمین سینیٹ سید یوسف رضا گیلانی تے قومی اسمبلی دے اپوزیشن لیڈر محمود خان اچکزئی نوں خط لکھ کے ارکان دے ناں بھیجن دی درخواست کر دتی اے۔ ناں ملدے ای 30 رکنی پارلیمانی کمیٹی دا نوٹیفکیشن جاری کر دتا جائے گا۔
پارلیمانی ذرائع دے مطابق وزیراعظم شہباز شریف نے انتخابی اصلاحات دے معاملے تے اپوزیشن نوں باقاعدہ مذاکرات دی دعوت دین دا فیصلہ کر لیا اے۔ حکومت نے فیصلہ کیتا اے کہ آئندہ انتخابات وچ شفافیت یقینی بناؤن لئی اپوزیشن نوں مذاکرات دی دعوت دتی جائے گی۔ وزیراعظم نے انتخابی اصلاحات لئی اپوزیشن نوں پارلیمانی کمیٹی وچ شامل کرن دی ہدایت وی کر دتی اے۔
الیکشن اصلاحات لئی پارلیمانی کمیٹی دی تشکیل دے سلسلے وچ بیرسٹر عقیل ملک نے سینیٹ وچ قرارداد پیش کر دتی۔
میڈیا رپورٹس دے مطابق سپیکر قومی اسمبلی سردار ایاز صادق نے وزیراعظم دے ناں خط وچ انہاں نوں قائدِ ایوان دے طور تے 15 ارکان دے ناں بھیجن دی درخواست کیتی اے۔ ایس طرح چیئرمین سینیٹ یوسف رضا گیلانی نوں 10 سینیٹرز دے ناں بھیجن تے قومی اسمبلی وچ اپوزیشن لیڈر محمود اچکزئی نوں 5 ارکان دے ناں بھیجن دا آکھیا گیا اے۔
خط وچ تیناں رہنماؤں نوں جلد از جلد ناں بھیجن دی درخواست کیتی گئی اے۔ ناں ملدے ای 30 رکنی پارلیمانی کمیٹی دا نوٹیفکیشن جاری کر دتا جائے گا۔ سپیکر قومی اسمبلی نے حکومت تے اپوزیشن دے چیف وہپ نوں وی خط لکھے نیں۔
وزیراعظم دے ناں خط وفاقی وزیر پارلیمانی امور طارق فضل چودھری دے حوالے کیتا گیا اے۔ کمیٹی وچ نمائندگی حکومت تے اپوزیشن دی پارلیمنٹ وچ نمائندگی دے تناسب نال ہووے گی۔ سینیٹ تے قومی اسمبلی دے اگلے اجلاس توں پہلاں پارلیمانی کمیٹی تشکیل دتے جان دا امکان اے۔
سپیکر قومی اسمبلی ایاز صادق نے تیناں خطوط لکھے جان دی تصدیق کردیاں آکھیا کہ پارلیمانی روایات دے مطابق ہر سیاسی جماعت نوں ایوان وچ اوہدی تعداد دے تناسب نال نمائندگی دتی جائے گی۔
ذرائع دے مطابق قومی اسمبلی تے سینیٹ دے اگلے اجلاس توں پہلاں پارلیمانی کمیٹی تشکیل دتے جان دا امکان اے، جس توں بعد انتخابی اصلاحات نال متعلق معاملات تے کمیٹی دی سطح تے کم شروع ہو سکے گا۔
وفاقی وزیر پارلیمانی امور ڈاکٹر طارق فضل چودھری نے نجی ٹی وی نال گل بات کردیاں آکھیا کہ قومی اسمبلی توں الیکشن ریفارمز کمیٹی دی تشکیل دی منظوری دتی جا چکی اے، جس توں بعد سپیکر قومی اسمبلی جلد کمیٹی دے قیام دا باقاعدہ نوٹیفکیشن جاری کرن گے۔ کمیٹی دے ارکان دے ناں حتمی کرن دا عمل ہن وی باقی اے۔ قومی اسمبلی وچ جدوں موشن پیش کیتی گئی سی تاں تحریک انصاف نے ایس دی مخالفت نہیں کیتی۔
اوہناں آکھیا کہ مجوزہ کمیٹی 30 ارکان تے مشتمل ہووے گی، جس وچ قومی اسمبلی توں 20 جدوں کہ سینیٹ توں 10 ارکان شامل ہون گے۔ کمیٹی وچ نشستاں دی تقسیم ایوان وچ سیاسی جماعتاں دی عددی نمائندگی دے تناسب نال ہووے گی۔ کمیٹی بناؤن دا مقصد انتخابی نظام وچ بہتری، شفافیت تے اصلاحات لئی پارلیمانی سطح تے مشاورت تے اتفاقِ رائے نوں فروغ دینا اے۔
ڈاکٹر طارق فضل چودھری نے آکھیا کہ ساڈی کوشش ہووے گی کہ انتخابی اصلاحات دے عمل وچ اپوزیشن سمیت تمام پارلیمانی جماعتاں دیاں مثبت، تعمیری تے قابلِ عمل تجاویز نوں مناسب اہمیت دتی جائے، تاں جو اک ایسا انتخابی نظام بنایا جا سکے جو شفافیت، اعتماد تے جمہوری قدراں نوں ہور مضبوط کرے۔
وفاقی وزیر نے آکھیا کہ انتخابی اصلاحات کسے اک جماعت دا معاملہ نہیں بلکہ جمہوری نظام نوں مضبوط بناؤن دا سانجھا قومی معاملہ اے۔ ایس مقصد لئی تمام سیاسی جماعتاں نوں باہمی مشاورت تے قومی مفاد نوں ترجیح دیندے ہوئے اپنا مؤثر کردار ادا کرنا چاہیدا اے۔
دوجے پاسے پاکستان تحریک انصاف دے چیئرمین بیرسٹر گوہر نے انتخابی اصلاحات کمیٹی وچ حکومت تے اپوزیشن دی برابر نمائندگی دا مطالبہ کر دتا۔
پارلیمنٹ ہاؤس دے باہر میڈیا نال گل بات کردیاں بیرسٹر گوہر نے آکھیا کہ تہاڈے 15 تے ساڈے 5 ارکان، ایس طرح بیٹھن نالوں نہ بیٹھنا بہتر اے۔ انتخابی اصلاحات لئی حکومت تے اپوزیشن دی نمائندگی برابر ہونی چاہیدی اے۔ انتخابی اصلاحات غیرجانبدار تے عوامی امنگاں دے مطابق ہونیاں چاہیدیاں نیں۔
اوہناں آکھیا کہ بیرونی انتشار دا پوری قوم رل کے مقابلہ کردی اے، پر اندرونی انتشار ملک نوں زیادہ نقصان پہنچاؤندا اے۔ ملک وچ کشیدگی ودھاؤن دی بجائے سیاسی رہنماؤں نوں اپنا کردار ادا کرنا چاہیدا اے۔
ادھر چیئرمین پاکستان پیپلز پارٹی بلاول بھٹو زرداری دی ہدایت تے پیپلز پارٹی دی نائب صدر سینیٹر شیری رحمان دی قیادت وچ وفد نے سینیٹ وچ قائدِ حزبِ اختلاف علامہ راجہ ناصر عباس دے چیمبر وچ جا کے اپوزیشن رہنماؤں نال ملاقات کیتی تے انہاں نوں انتخابی اصلاحات نال متعلق پارلیمانی کمیٹی وچ شامل ہون دی دعوت دتی۔
پیپلز پارٹی دے وفد وچ نیئر حسین بخاری، ندیم افضل چن تے سینیٹر وقار مہدی شامل سن، جدوں کہ اپوزیشن دے وفد وچ علامہ راجہ ناصر عباس، محمود خان اچکزئی، نور الحق قادری تے سینیٹر علی ظفر شامل سن۔
پیپلز پارٹی دے وفد نے شفاف، آزادانہ تے منصفانہ انتخابات لئی حکومت تے اپوزیشن نوں سانجھیاں تجاویز تیار کرن دا آکھیا۔
ایس موقع تے سینیٹر شیری رحمان نے آکھیا کہ تمام سیاسی جماعتاں دے اعتماد والا انتخابی نظام تیار کرنا پیپلز پارٹی دا مقصد اے۔ اپوزیشن جماعتاں انتخابی اصلاحات کمیٹی وچ اپنی تجاویز پیش کرن۔ انتخابی عمل تے وار وار اٹھن والے سوال پارلیمان دی ساکھ نوں متاثر کردے نیں۔ شفاف، آزادانہ تے منصفانہ انتخابات ووٹراں دے حقاں دے تحفظ تے جمہوری اداریاں دی مضبوطی لئی ضروری نیں۔ انتخابی اصلاحات کمیٹی اپنی سفارشاں منظوری لئی پارلیمان وچ پیش کرے گی۔
علامہ راجہ ناصر عباس نے انتخابات وچ شفافیت مؤثر بناؤن دی تجویز نال اتفاق کیتا۔
بعد وچ میڈیا نال گل بات کردیاں پاکستان پیپلز پارٹی دی نائب صدر سینیٹر شیری رحمان نے آکھیا کہ اسیں چیئرمین بلاول بھٹو زرداری دی ہدایت تے اج اپوزیشن وفد نال ملاقات کرن گئے ساں۔ چیئرمین دے آکھن تے دوناں ایواناں وچ جیہڑیاں الیکٹورل ریفارمز دیاں کمیٹیاں بن رہیاں نیں، اوہناں وچ تمام جماعتاں اپنی شمولیت یقینی بناؤن۔
اسیں اپوزیشن نوں آکھیا کہ ایس کمیٹی وچ لازمی شامل ہوون، اپنا فعال کردار ادا کرن تے اپنے تحفظات کھل کے بیان کرن۔ کمیٹیاں پارلیمانی امور دا دل ہوندیاں نیں، جے اوہناں وچ اپوزیشن غیر حاضر رہے گی تاں اوہناں دے تحفظات کِویں دور کیتے جان گے؟
ہر دور دے اپنے چیلنج ہوندے نیں۔ ساڈی تاں ایہہ وی خواہش اے کہ اوہ ہر سٹینڈنگ کمیٹی وچ وی شامل ہون، جنہاں دا اوہناں نے بائیکاٹ کیتا ہویا اے۔ اسیں ہر دور وچ انتخابی اصلاحات دے میثاق دی گل کردے آئے آں۔
اپوزیشن رہنماؤں نے ساڈی گل خیر سگالی دے جذبے نال سنی تے آکھیا کہ مشاورت کرکے جواب دیواں گے۔ اوہناں نے چیئرمین بلاول بھٹو دا خصوصی شکریہ ادا کیتا۔ سانوں امید اے کہ اوہ ساڈیاں تجاویز دا مثبت جواب دین گے۔
ذرائع دے مطابق محمود اچکزئی تے علامہ ناصر عباس نے پی ٹی آئی قیادت نال مشاورت لئی وقت منگیا اے، تاہم اپوزیشن نے کمیٹی وچ شرکت کرن دا عندیہ دتا اے۔
اپوزیشن لیڈر محمود اچکزئی تے علامہ راجہ ناصر عباس نال پیپلز پارٹی دے وفد نے چند گھنٹیاں بعد دوبارہ ملاقات کیتی، جس وچ علامہ راجہ ناصر عباس نے انتخابات وچ شفافیت مؤثر بناؤن دی تجویز نال اتفاق کیتا۔
ذرائع دے مطابق کمیٹی 2024 دے عام انتخابات، ضمنی انتخابات، گلگت بلتستان تے آزاد کشمیر دے انتخابات وچ دھاندلی دیاں شکایتاں دا جائزہ لے گی۔ دھاندلی دے ذمہ داراں دا تعین کرکے آئندہ لئی ایس طرح دیاں شکایتاں دا راستہ روکیا جائے گا، جدوں کہ کمیٹی شفاف انتخابات دے انعقاد لئی سفارشاں وی تیار کرے گی۔
