30 سال پرانا کھنہ پولیس اسٹیشن مسمار، تجاوزات خلاف کارروائی بلا امتیاز ہووے گی: محسن نقوی
پولیس اسٹیشن گرین بیلٹ اُتے تعمیر سی: وزیر داخلہ، چیئرمین سی ڈی اے تے آئی جی اسلام آباد آپریشن دا جائزہ لیندے رہے
اپنے اداریاں لئی وی اوہی چیک اینڈ بیلنس رکھیا، متاثرہ لوکاں نوں متبادل جگہ دینا حکومت دی ذمہ داری اے: میڈیا نال گفتگو
اسلام آباد (خصوصی رپورٹر) اسلام آباد وچ تجاوزات خلاف جاری آپریشن دوران سی ڈی اے نے کھنہ پل انٹرچینج دے نیڑے گرین بیلٹ اُتے قائم 30 سال پرانا کھنہ پولیس اسٹیشن مسمار کر دتا۔ وفاقی وزیر داخلہ محسن نقوی، چیئرمین سی ڈی اے تے آئی جی اسلام آباد نے موقع اُتے کارروائی دا جائزہ لیا۔
میڈیا نال گفتگو کردے ہوئے وزیر داخلہ نے آکھیا کہ سی ڈی اے پولیس اسٹیشن لئی نئی عمارت تعمیر کرے گا۔ اسلام آباد دی خوبصورتی بحال کرنا تے گرین بیلٹس دی حفاظت کرنا حکومت دیاں ترجیحاں وچ شامل اے۔ تجاوزات خلاف کارروائی بلاامتیاز جاری رہے گی۔ اسیں اپنے اداریاں لئی وی اوہی چیک اینڈ بیلنس رکھیا اے۔ چند روز پہلے ایف سی دی اک مکمل تنصیب ہٹا کے اوتھے پارک تعمیر کیتا جا رہیا اے۔ متاثرہ لوکاں نوں متبادل جگہ فراہم کرنا حکومت دی ذمہ داری اے۔
محسن نقوی نے آکھیا کہ اسلام آباد وچ 10 نویں پولیس اسٹیشن تعمیر کیتے جان گے۔ ابتدائی طور اُتے سارے 27 پولیس اسٹیشنز دیاں عمارتاں تبدیل کرن دا ہدف اے۔ انہاں پولیس ہیلپ لائن 15 اُتے کالاں غلط شہر دی پولیس نوں منتقل ہون دے معاملے دا جائزہ لین دی وی یقین دہانی کروائی۔
وزیر داخلہ نے اسلام آباد وچ ایمرجنسی رسپانس تے فائر فائٹنگ سروسز نوں جدید بناؤن دے منصوبے دا اعلان کردے ہوئے آکھیا کہ 88 میٹر بلند عمارتاں تک پہنچن والی ایریل لیڈر فائر انجن پہنچ چکی اے۔
اسلام آباد ایمرجنسی سروسز دے ڈی جی دی برطرفی دے معاملے اُتے انہاں آکھیا کہ وزیراعظم نوں فیصلے اُتے نظرثانی دی درخواست کیتی اے۔ وزیراعظم اس معاملے اُتے کمیٹی بناؤن بارے غور کر رہے نیں۔ جے کمیٹی نے متعلقہ افسر نوں بے قصور قرار دتا تاں انہاں دی دوبارہ تعیناتی دی امید اے۔
محسن نقوی نے آکھیا کہ ڈیفنس ہاؤسنگ اتھارٹی (ڈی ایچ اے) دے تعاون نال تعمیر ہون والا مارگلہ انکلیو تقریباً 20 ہزار کنال رقبے اُتے مشتمل اے تے ہن آخری مرحلے وچ اے۔ اسلام آباد وچ نویں کرکٹ اسٹیڈیم دا سنگ بنیاد آئندہ ہفتے یا 10 دناں دے اندر رکھے جان دی توقع اے۔
