وزیراعلیٰ سندھ دی آسیان ملکاں دے سفیراں نال ملاقات، سرمایہ کاری دی دعوت

مشترکہ دلچسپی نوں عملی تعاون وچ بدلݨ لئی سفارتی مشنز نال فعال رابطہ برقرار رکھاں گے، ہر ممکن تعاون تے سہولتاں فراہم کراں گے: مراد علی شاہ

سندھ اپنی اہم جغرافیائی حیثیت تے بندرگاہی ڈھانچے دی وجہ توں بین الاقوامی سرمایہ کاراں لئی وڈے مواقع رکھدا اے: مراد علی شاہ

کراچی (سٹاف رپورٹر) وزیراعلیٰ سندھ سید مراد علی شاہ نے جمعے دے روز فلپائن تے آسیان دے ہور رکن ملکاں نوں سندھ وچ خاص طور تے زراعت، فوڈ پروسیسنگ، ادویات سازی، انفارمیشن ٹیکنالوجی، توانائی، معدنیات، صنعت، لاجسٹکس تے سیاحت دے شعبیاں وچ سرمایہ کاری دے وسیع مواقع توں فائدہ چکن دی دعوت دتی۔

اوہ وزیراعلیٰ ہاؤس وچ آسیان دے سفیراں، ہائی کمشنرز تے سفارت کاراں دے اعلیٰ سطح دے وفد نال گل بات کر رہے سن۔ وفد دی قیادت پاکستان وچ فلپائن دے سفیر تے اسلام آباد وچ آسیان کمیٹی دے چیئرمین ڈاکٹر ایمانوئل آر فرنانڈیز کر رہے سن۔

وفد وچ انڈونیشیا دے سفیر لیفٹیننٹ جنرل (ر) چندرا وارسننتو سوکوتجو، ملائیشیا دے ہائی کمشنر داتو محمد اظہر مزلاں، میانمار دے سفیر وونا ہان، تھائی لینڈ دے سفیر رونگ وودی ویرا بوتر، انڈونیشیا دے قونصل جنرل مذکر ایم اے، ملائیشیا دے قونصل جنرل محمد یونس ابراہیم، تھائی لینڈ دے قونصل جنرل سوراشیت بونٹینند، ویتنام دے تجارتی مشن دی سربراہ نگوین تھی دیپ ہا، کراچی وچ فلپائن دے اعزازی قونصل جنرل ڈاکٹر عمران یوسف، برونائی دارالسلام دے نائب سربراہ مشن ایچ جے خیرالریجل حازم تے فلپائن دے سفیر دی اہلیہ ایلیشیا کالاؤ فرنانڈیز شامل سن۔

ملاقات دوران سفیراں، ہائی کمشنرز تے سفارتی نمائندیاں نے سندھ تے اپنے اپنے ملکاں دے درمیان رابطے مضبوط بناؤن بارے اپنے خیالات پیش کیتے۔ انہاں دوطرفہ تجارت نوں فروغ دین، سرمایہ کاری ودھاؤن، ثقافتی تے تعلیمی تبادلے وسیع کرن تے ادارہ جاتی تے عوامی سطح اُتے قریبی تعلقات قائم کرن دی اہمیت اُتے زور دتا۔

سفارت کاراں نے اس امکان دا وی ذکر کیتا کہ انہاں دے ملک تے سندھ اک دوجے دی مہارت، ٹیکنالوجی، تجربے تے کاروباری مواقع توں فائدہ چک سکدے نیں۔ انہاں زراعت، صنعتی ترقی، تعلیم، سیاحت، انفارمیشن ٹیکنالوجی، توانائی تے انسانی وسائل دی ترقی دے شعبیاں وچ مشترکہ اقدامات لبھن وچ دلچسپی ظاہر کیتی۔

وزیراعلیٰ نے انہاں تجاویز دا خیرمقدم کردیاں آکھیا کہ سندھ حکومت مشترکہ دلچسپی نوں عملی تعاون وچ بدلݨ لئی آسیان دے سفارتی مشنز نال فعال رابطہ برقرار رکھے گی۔

انہاں آکھیا کہ باقاعدہ رابطیاں، علم دے تبادلے تے ادارہ جاتی تعاون دے ذریعے دونے پاسے اپنی صلاحیتاں تے مہارت توں فائدہ حاصل کر سکدے نیں۔ مراد علی شاہ نے فلپائن تے آسیان دے ہور رکن ملکاں نوں صوبے وچ سرمایہ کاری دے مختلف مواقع توں فائدہ چکن دی دعوت دتی، خاص طور اُتے زراعت، فوڈ پروسیسنگ، ادویات سازی، انفارمیشن ٹیکنالوجی، توانائی، معدنیات، صنعت، لاجسٹکس تے سیاحت دے شعبیاں وچ۔

انہاں دورے اُتے آئے سفارت کاراں نوں یقین دلوایا کہ سندھ حکومت ممکنہ سرمایہ کاراں نوں مکمل تعاون تے سہولتاں فراہم کرے گی۔

وفد دا خیرمقدم کردیاں وزیراعلیٰ مراد علی شاہ نے آکھیا کہ سندھ، خاص طور اُتے کراچی، اپنی اہم جغرافیائی حیثیت، مضبوط صنعتی بنیاد، بندرگاہی ڈھانچے، ہنرمند افرادی قوت تے وڈی ملکی منڈی تک رسائی دی وجہ توں بین الاقوامی سرمایہ کاراں لئی وڈے مواقع رکھدا اے۔ انہاں آکھیا کہ تجارت، سرمایہ کاری، زراعت، ادویات سازی، تعلیم، دفاع تے ٹیکنالوجی دے شعبیاں وچ تعاون نال انہاں تعلقات نوں ہور مضبوط بنایا جا سکدا اے۔

وزیراعلیٰ نے زراعت تے غذائی تحفظ نوں تعاون دے اہم شعبے قرار دیندیاں آکھیا کہ خاص طور اُتے چاول دی تجارت، بیجاں دی تیاری، زرعی ٹیکنالوجی، فوڈ پروسیسنگ تے جدید زرعی طریقیاں وچ سانجھ دے وسیع امکانات موجود نیں۔

انہاں آکھیا کہ پاکستان دے اہم تجارتی تے مالیاتی مرکز دی حیثیت نال کراچی بین الاقوامی کاروباری اداریاں نوں وڈیاں منڈیاں، بندرگاہی سہولتاں، صنعتی ڈھانچے تے مستحکم تجارتی نیٹ ورکس تک رسائی فراہم کردا اے۔ انہاں آسیان دیاں کمپنیوں نوں سندھ دے صنعتی زونز وچ سرمایہ کاری دے مواقع تلاش کرن تے مشترکہ منصوبیاں، ٹیکنالوجی دی منتقلی تے نجی شعبے دے تعاون دے ذریعے مقامی کاروباری اداریاں نال شراکت داری قائم کرن دی دعوت دتی۔

وزیراعلیٰ نے سیاحت، تعلیم، فنی تربیت تے ثقافتی تبادلیاں دے شعبیاں وچ تعاون مضبوط بناؤن دی اہمیت اُتے وی زور دتا۔

مراد علی شاہ نے پاکستان وچ پرتگال دے سفیر مسٹر پالو ڈومنگوز نال ملاقات دوران پرتگالی کمپنیوں نوں دعوت دتی کہ اوہ جدید ڈی سیلینیشن ٹیکنالوجی دے ذریعے کراچی دیاں ودھدیاں پانی دیاں ضروریات پوری کرن لئی سندھ حکومت نال شراکت داری کرن۔ انہاں توانائی دے شعبے وچ سرمایہ کاری دے مواقع تے فٹ بال دے فروغ لئی تعاون دے امکانات تلاش کرن اُتے وی زور دتا۔