جوڈیشل کمیشن دے فیصلے خلاف درخواست اُتے نواں بینچ تشکیل دین دا حکم

اسلام آباد (اپنے نامہ نگار توں) اسلام آباد ہائیکورٹ دے چیف جسٹس سردار سرفراز ڈوگر نے جوڈیشل کمیشن آف پاکستان دے 28 اپریل 2026 دے فیصلے خلاف دائر آئینی درخواست اُتے سماعت لئی نواں بینچ تشکیل دین دی ہدایت کر دتی۔

گزشتہ روز درخواست گزار دے وکیل یاور گردیزی نے آکھیا کہ آئین دے آرٹیکل 199 دے تحت درخواست دائر کیتی گئی اے۔ درخواست گزار دے وکیل نے جوڈیشل کمیشن دے 28 اپریل 2026 دے فیصلے نوں کالعدم قرار دین دی استدعا کردیاں آکھیا کہ جوڈیشل کمیشن نے فیصلہ دتا سی کہ تبادلے دی وجہ نال خالی ہون والی نشست نوں ابتدائی تعیناتی لئی خالی آسامی نہیں سمجھیا جائے گا۔

وکیل دے مطابق جوڈیشل کمیشن دا ایہ فیصلہ آئین دے آرٹیکل 4، 25، 175 اے تے 193 دے منافی تے کالعدم اے۔ انہاں مطالبہ کیتا کہ 29 اپریل 2026 دے تبادلیں توں بعد خالی ہون والیاں 3 اسامیاں نوں آرٹیکل 175 اے (8) دے تحت خالی اسامیاں قرار دتا جائے۔

چیف جسٹس سرفراز ڈوگر نے کیس کسے ہور بینچ وچ مقرر کرن دی ہدایت کردیاں آکھیا کہ جس جوڈیشل کمیشن خلاف درخواست دائر کیتی گئی اے، اوہ اس دے ممبر وی نیں، اس لئی بہتر اے کہ درخواست کسے ہور بینچ وچ بھیج دتی جائے۔