وزیر پٹرولیم تے سعودی سفیر دی ملاقات، توانائی دے شعبے وچ تعاون اُتے اتفاق
سعودی کمپنیواں نوں پاکستان وچ تیل ذخیرہ کرن دی پیشکش، حب وچ ریفائننگ کمپلیکس دے منصوبے اُتے گل بات
سعودی سفارت خانے وچ پاکستانی شہریاں دیاں ویزا درخواستاں اُتے اوسے روز کارروائی: راجح بن طامی
اسلام آباد (اے پی پی) سعودی سفیر نے اعلان کیتا اے کہ اسلام آباد وچ سعودی سفارت خانے نے پاکستانی شہریاں لئی ویزا درخواستاں دی اوسے روز پراسیسنگ شروع کر دتی اے، تاں جو سفر نوں آسان بنایا جا سکے تے کاروباری، ثقافتی تے عوامی سطح اُتے رابطیاں نوں مضبوط بنایا جا سکے۔
وفاقی وزیر پٹرولیم علی پرویز ملک نال سعودی سفیر ڈاکٹر راجح بن طامی البقمی دی ملاقات ہوئی، جس وچ توانائی، پٹرولیم، معدنیات تے سرمایہ کاری دے شعبیاں وچ تعاون ودھاؤن اُتے اتفاق ہویا۔
وفاقی وزیر نے دسیا کہ پاکستان نے ٹیکس نیوٹرل بانڈڈ سٹوریج پالیسی منظور کر لئی اے، جس دے تحت سعودی کمپنیواں نوں پاکستان وچ تجارتی بنیاداں اُتے تیل ذخیرہ کرن دی پیشکش کیتی گئی اے۔
حب، بلوچستان وچ وڈے پٹرولیم سٹوریج تے ریفائننگ کمپلیکس دے قیام نالے پاکستانی ریفائنریز دی اپ گریڈیشن وچ سعودی سرمایہ کاری دے امکانات اُتے وی تبادلہ خیال کیتا گیا۔
ملاقات دوران سعودی آرامکو توں اضافی خام تیل تے ایل پی جی دی فراہمی بارے وی گل بات ہوئی۔ علی پرویز ملک نے سعودی نائب وزیر برائے معدنیات خالد المدیفر نوں 12 تے 13 نومبر نوں پاکستان منرلز انویسٹمنٹ فورم وچ شرکت دی دعوت وی دتی۔
وفاقی وزیر نے دسیا کہ پاکستان وچ تیل ذخیرہ کرن دیاں سہولتاں سعودی عرب نوں آبنائے ہرمز تے آبنائے باب المندب نال جڑی سمندری ترسیل دے خطرات وچ تنوع لیاؤن تے ایشیائی منڈیاں تک رسائی حاصل کرن وچ مدد دین گیاں۔
