وفاقی ملازمتاں وچ بلوچستان دا کوٹہ پورا، 32 ہزار 580 ملازمین بھرتی

مجموعی وفاقی ملازماں وچ بلوچستان دا حصہ 6.04 فیصد، مقررہ کوٹہ 6 فیصد اے

وفاقی سیکرٹریٹ وچ بلوچستان دی نمائندگی 2.89 فیصد، سول آرمڈ فورسز وچ 7.01 فیصد

اسلام آباد (ایس ایم زمان) وفاقی محکمیاں وچ بلوچستان دے ڈومیسائل دے حامل ملازماں دی تعداد 32 ہزار 580 اے، جو مجموعی وفاقی ملازماں دا 6.04 فیصد بندی اے۔ وفاقی ملازمتاں وچ بلوچستان دا آئینی کوٹہ 6 فیصد مقرر اے، جس دے مقابلے وچ صوبے دی مجموعی نمائندگی مقررہ کوٹے توں کجھ ودھ اے، تاہم وفاقی محکمیاں وچ بلوچستان دے ملازماں دا تناسب وکھ وکھ اے۔

دستیاب اعدادوشمار دے مطابق وفاقی سیکرٹریٹ وچ بلوچستان دے ڈومیسائل دے حامل ملازماں دی تعداد 379 اے، جو مجموعی ملازماں دا 2.89 فیصد بندی اے تے مقررہ کوٹے توں گھٹ اے۔

وفاقی حکومت دے ماتحت اداریاں وچ بلوچستان دے ملازماں دی تعداد 2 ہزار 112 اے، جو 3.40 فیصد بندی اے۔

وفاقی آئینی اداریاں وچ بلوچستان دے ملازماں دی تعداد 966 اے، جو مجموعی تعداد دا 10.41 فیصد اے، جدکہ سول آرمڈ فورسز وچ صوبے دے ڈومیسائل دے حامل 16 ہزار 76 ملازم تعینات نیں، جو 7.01 فیصد بندی اے۔

سول آرمڈ فورسز توں علاوہ ہور ماتحت تے منسلک محکمیاں وچ بلوچستان دے ملازماں دی تعداد 13 ہزار 47 اے، جو مجموعی ملازماں دا 5.80 فیصد بندی اے تے مقررہ کوٹے دے تقریباً برابر اے۔