سنگاپور دے وزیر خارجہ دیاں وزیراعظم تے فیلڈ مارشل نال ملاقاتاں

شہباز شریف نے سنگاپور دی معاشی تبدیلی نوں سراہیا، تعاون ودھاؤن اُتے اتفاق، سید عاصم منیر دا تعلقات ہور مضبوط بناؤن دا عزم، اسحاق ڈار نال مذاکرات

اسلام آباد، راولپنڈی (نامہ نگار، خصوصی نیوز رپورٹر) سنگاپور دے وزیر خارجہ ڈاکٹر ویویان بالاکرشنن نے وزیراعظم شہباز شریف، نائب وزیراعظم اسحاق ڈار تے فیلڈ مارشل سید عاصم منیر نال ملاقاتاں کیتیاں۔ ملاقاتاں دوران دوناں ملکاں دے درمیان تجارت، سرمایہ کاری، تعلیم، زراعت، غذائی تحفظ تے ہور شعبیاں وچ تعاون ودھاؤن اُتے اتفاق کیتا گیا۔

وزیراعظم شہباز شریف نال ملاقات دوران سنگاپور دے نال دیرینہ تے دوستانہ تعلقات ہور مضبوط بناؤن دے پاکستان دے عزم دا اعادہ کیتا گیا۔ وزیراعظم نے سنگاپور دی شاندار معاشی تبدیلی، جدت تے ترقی دے شعبیاں وچ کامیابیاں نوں سراہدیاں آکھیا کہ پاکستان سنگاپور نال شراکت داری نوں دوطرفہ تے آسیان دے پلیٹ فارم سمیت کثیرالجہتی سطح اُتے اہمیت دیندا اے۔

دونوں پاسیاں نے دوطرفہ تجارت تے سرمایہ کاری ودھاؤن تے ترجیحی شعبیاں وچ تعاون دا دائرہ وسیع کرن دے طریقیاں اُتے تبادلہ خیال کیتا۔ انہاں شعبیاں وچ ڈیجیٹل معیشت، فن ٹیک، بنیادی ڈھانچہ، لاجسٹکس، چھوٹے تے درمیانے درجے دے کاروبار تے خدمات شامل نیں۔ دوناں رہنماواں نے عوامی رابطے ودھاؤن تے باہمی فائدے والے معاشی تعاون دے نویں راستے لبھن بارے وی گل بات کیتی۔ علاقائی تے عالمی صورتحال اُتے تبادلہ خیال کردیاں دوطرفہ تے کثیرالجہتی فورمز اُتے تعاون جاری رکھݨ دے عزم دا اعادہ کیتا گیا۔

وزیراعظم نے دورہ سنگاپور دی دعوت قبول کر لئی۔

دریں اثنا سنگاپور دے وزیر خارجہ نے جی ایچ کیو راولپنڈی دا دورہ کیتا تے چیف آف ڈیفنس فورسز فیلڈ مارشل سید عاصم منیر نال ملاقات کیتی۔ آئی ایس پی آر دے مطابق ملاقات دوران باہمی دلچسپی دے معاملے، علاقائی تے عالمی سطح اُتے بدل دی سکیورٹی صورتحال تے دوطرفہ تعاون نوں فروغ دین دے امکانات اُتے تبادلہ خیال کیتا گیا۔ علاقائی امن تے استحکام بارے وی خیالات دا تبادلہ ہویا تے مشترکہ مفادات والے شعبیاں وچ مسلسل رابطیاں تے تعاون دی اہمیت اُتے زور دتا گیا۔

فیلڈ مارشل سید عاصم منیر نے سنگاپور نال تعلقات ہور مضبوط بناؤن لئی پاکستان دے عزم دا اعادہ کردیاں علاقائی امن، استحکام تے سلامتی دے فروغ لئی ادارہ جاتی تے تعمیری رابطیاں دی اہمیت اُتے زور دتا۔ سنگاپور دے وزیر خارجہ نے دوناں ملکاں دے تعلقات ہور مضبوط بناؤن دی خواہش ظاہر کیتی تے پاک فوج دیاں پیشہ ورانہ صلاحیتاں نوں سراہدیاں علاقائی امن تے استحکام لئی پاکستان دیاں خدمات دا اعتراف کیتا۔

ایس توں پہلاں سنگاپور دے وزیر خارجہ نے نائب وزیراعظم اسحاق ڈار دے نال پریس کانفرنس کیتی۔ ڈاکٹر ویویان بالاکرشنن نے آکھیا کہ پاکستان مشرق وسطیٰ دی کشیدگی وچ قابلِ تعریف کردار ادا کر رہیا اے تے اس کردار اُتے پاکستان نوں مبارکباد دیندا ہاں۔

اسحاق ڈار نے آکھیا کہ سنگاپور دے وزیر خارجہ دا خیرمقدم کردیاں خوشی ہو رہی اے تے مسلسل دوطرفہ سیاسی مشاورت جاری رکھݨ اُتے اتفاق ہویا اے۔ پاکستان انہاں پہلے ملکاں وچ شامل سی جنہاں نے سنگاپور نوں تسلیم کیتا، جدکہ دو دہائیاں وچ سنگاپور دے کسے وزیر خارجہ دا ایہہ پہلا دورہ پاکستان اے۔