ہائیکورٹ دا بیوی نوں 6 تولے سونا واپس کرن دا حکم کالعدم قرار

شادی ویلے بیوی نوں دتا جان والا سونا اوہدی اپنی ملکیت ہوندا اے: تحریری فیصلہ

لاہور (کورٹ رپورٹر) لاہور ہائیکورٹ نے بیوی نوں 6 تولے سونا واپس کرن دا حکم کالعدم قرار دے دتا۔ عدالت نے واضح کیتا کہ شادی ویلے بیوی نوں دتا جان والا سونا اوہدی اپنی ملکیت ہوندا اے، تاہم شوہر ولوں سونا کھوہن دے الزام نوں ثابت کرنا بیوی دی ذمہ داری اے۔

لاہور ہائیکورٹ دے جسٹس انوار حسین نے بیوی نوں چھ تولے سونا واپس کرن بارے 9 صفحیاں اُتے مشتمل تحریری فیصلہ جاری کردیاں فیملی کورٹ تے اپیلٹ کورٹ دے فیصلے کالعدم قرار دے دتے۔

ہائیکورٹ دے جسٹس انوار حسین نے شہری محسن علی دی درخواست جزوی طور اُتے منظور کردیاں ایہہ فیصلہ جاری کیتا۔ عدالتی فیصلے مطابق بیوی نے جولائی 2019 وچ پہلا دعویٰ دائر کیتا سی، جس وچ نہ سونے دی مقدار دا ذکر کیتا گیا تے نہ ہی سونا واپس کرن دا مطالبہ کیتا گیا سی۔

بعد وچ خاتون نے اکتوبر 2019 وچ دوجا دعویٰ دائر کردیاں شوہر توں چھ تولے سونا واپس کرن دی استدعا کیتی۔ عدالت نے نشاندہی کیتی کہ دوجے دعوے وچ وی متعلقہ گواہاں دی نشاندہی نئیں کیتی گئی سی۔

بیوی اپنا ایہہ الزام ثابت کرن وچ ناکام رہی کہ شوہر نے اس توں چھ تولے سونا کھوہ لیا سی۔ ہائیکورٹ نے قرار دتا کہ دستیاب ثبوتاں دی روشنی وچ بیوی نوں چھ تولے سونا واپس کرن دا حکم برقرار نئیں رکھیا جا سکدا۔

عدالت نے واضح کیتا کہ نان نفقہ تے جہیز دے سامان بارے سابقہ عدالتی فیصلےآں وچ مداخلت نئیں کیتی جائے گی۔