پاکستان دے 40 فیصد بچے قد وچ چھوٹے، ادھے نوعمر مُنڈے تے کڑیاں غذائی کمی دا شکار
18 فیصد بچیاں دا وزن گھٹ، ملک وچ 3 کروڑ 20 لاکھ ذہنی امراض دے مریض، 1050 ماہرین نفسیات، ہیپاٹائٹس نال سالانہ 48 ہزار اموات
جعلی ادویات دی شناخت لئی نومبر دے آخر تک بارکوڈ نظام نافذ، صارف موبائل توں تفصیلات حاصل کر سکے گا: قومی اسمبلی دا وقفہ سوالات
اسلام آباد (سید قیصر شاہ، اسلم لڑکا) قومی اسمبلی نوں دسیا گیا اے کہ پاکستان وچ ذہنی امراض وچ مبتلا افراد دی تعداد 3 کروڑ 20 لاکھ 40 ہزار توں ودھ چکی اے، جدکہ ملک وچ رجسٹرڈ ماہرین نفسیات دی تعداد صرف 1050 اے۔ پاکستان ہیپاٹائٹس سی نال ہون والیاں اموات دے حوالے نال دنیا دے دس سرِفہرست ملکاں وچ شامل اے۔ ملک وچ ہیپاٹائٹس بی تے سی دے مریضاں دی مجموعی تعداد اک کروڑ 29 لاکھ تک پہنچ چکی اے، جدکہ ہر سال تقریباً 48 ہزار افراد ہیپاٹائٹس دے باعث موت دا شکار ہو رہے نیں۔
قومی اسمبلی وچ وقفہ سوالات دوران وزارت قومی صحت ولوں پیش کیتے گئے اعدادوشمار مطابق 2023 تک اسلام آباد وچ ذہنی امراض وچ مبتلا افراد دی تعداد 3 لاکھ سی۔ ملک بھر وچ ہر 2 لاکھ 45 ہزار 400 افراد لئی صرف اک ماہر نفسیات دستیاب اے۔ صوبائی سطح اُتے پنجاب وچ 406، سندھ وچ 228، خیبر پختونخوا وچ 122 تے بلوچستان وچ 44 ماہرین نفسیات رجسٹرڈ نیں۔
ایوان نوں دسیا گیا کہ ملک وچ ایڈز دے رجسٹرڈ مریضاں دی تعداد 3900 اے، جنہاں وچ سندھ دے 1915 تے پنجاب دے 1765 مریض شامل نیں۔ خیبر پختونخوا وچ 139، بلوچستان وچ 46، اسلام آباد وچ 30، آزاد کشمیر وچ چار تے گلگت بلتستان وچ اک مریض رجسٹرڈ اے۔
وزارت قومی صحت دی رپورٹ مطابق پاکستان وچ ہیپاٹائٹس بی دے 38 لاکھ 60 ہزار تے ہیپاٹائٹس سی دے 9 لاکھ مریض نیں۔ ملک وچ 2024 دوران ہیپاٹائٹس سی دے 88 ہزار توں ودھ نویں انفیکشن رپورٹ ہوئے۔
وزارت مذہبی امور نے قومی اسمبلی نوں دسیا کہ نجی حج سکیم دے تحت مجموعی طور اُتے 16 پیکیج متعارف کروائے گئے نیں۔ اکانومی پیکیج دی قیمت 14 لاکھ توں ساڑھے 17 لاکھ روپے، معیاری پیکیج دی قیمت 18 لاکھ 40 ہزار توں 23 لاکھ 40 ہزار روپے، جدکہ پریمیئم پیکیج دی قیمت 25 لاکھ توں 37 لاکھ 50 ہزار روپے مقرر کیتی گئی اے۔
وزارت ریلوے مطابق پاکستان ریلوے نے ٹکٹاں دی بکنگ دا نظام ڈیجیٹلائز کر دتا اے۔ وزارت آبی وسائل نے دسیا کہ اس وقت ملک وچ دستیاب آبی ذخائر صرف 33 دناں دیاں ضروریات پوری کرن دی گنجائش رکھدے نیں۔
وفاقی حکومت 18 ڈیمز دے منصوبیاں لئی مالی معاونت فراہم کر رہی اے۔ انہاں دی تکمیل نال مجموعی طور اُتے 83 لاکھ 21 ہزار 984 ایکڑ فٹ پانی ذخیرہ کیتا جا سکے گا تے 3 لاکھ 46 ہزار 447 ایکڑ زمین نوں سیراب کرن وچ مدد ملے گی۔
وزارت صحت مطابق پاکستان وچ 40 فیصد توں ودھ بچے عمر دے حساب نال پست قد نیں، 18 فیصد بچے گھٹ وزن دا شکار نیں، جدکہ 50 فیصد توں ودھ بچے تے نوعمر کڑیاں مختلف غذائی اجزا دی کمی دا شکار نیں۔
وزیر صحت سید مصطفیٰ کمال نے دسیا کہ جعلی ادویات دی روک تھام، دوا دی اصلیت، قیمت تے تاریخِ تنسیخ دی تصدیق لئی بارکوڈ نظام نومبر دے آخر تک ملک بھر وچ نافذ کر دتا جائے گا۔ ایس نظام دے تحت صارف موبائل فون نال دوا دا بارکوڈ سکین کرکے اوہدی تفصیلات حاصل کر سکے گا۔ اصلی دوا دی صورت وچ موبائل سکرین سبز، جدکہ جعلی دوا دی صورت وچ سرخ ہو جائے گی۔ ہن تک ملک بھر دیاں تقریباً 76 ہزار ادویات دا 99.99 فیصد ڈیٹا حاصل کیتا جا چکیا اے۔
وفاقی وزیر نے دسیا کہ پاکستان 2030 تک ویکسین دی خریداری لئی غیر ملکی مالی معاونت توں مکمل طور اُتے دستبردار ہو جائے گا۔
