قطر توں ایل این جی دا تِیجا جہاز پورٹ قاسم پہنچ گیا
کراچی (آئی این پی) ایل این جی لے کے آون والا جہاز شینڈونگ ریڈووڈ پورٹ قاسم اُتے لنگر انداز ہو گیا۔ قطر توں درآمد کیتی جان والی ایل این جی دی قیمت برینٹ خام تیل دی قیمت دے 13.37 فیصد دے برابر مقرر کیتی گئی اے۔
آبنائے ہرمز وچ کشیدگی دے باوجود پاکستان نوں ایل این جی دی فراہمی جاری اے تے اکتوبر وچ پاکستان پہنچن والا قطر توں ایل این جی دا ایہہ تِیجا کارگو اے۔ پہلا کارگو 13 اکتوبر نوں جہاز العریش دے ذریعے پاکستان پہنچیا سی، جدکہ دوجا کارگو 21 اکتوبر نوں پاکستان پہنچیا۔
قطر توں ایل این جی دی آمد نال پاکستان دے گیس سپلائی نظام نوں عارضی ریلیف ملن دی توقع کیتی جا رہی اے۔
