گواہ نوں دوبارہ طلب کرنا استغاثہ دا قانونی حق نہیں: سپریم کورٹ
ایہہ عدالت دا صوابدیدی اختیار اے، جدوں اضافی شہادت منصفانہ فیصلے لئی ضروری ہووے۔
اسلام آباد (اے پی پی) سپریم کورٹ نے قرار دتا اے کہ استغاثہ ولوں اپنے گواہ اُتے جرح مکمل ہون توں بعد دوبارہ بیان لین لئی قانون دے تحت مقررہ طریقہ کار اپنانا ضروری اے۔ ضابطہ فوجداری دی دفعہ 540 دے تحت گواہ نوں دوبارہ طلب کرنا استغاثہ دا قانونی حق نہیں، بلکہ عدالت دا صوابدیدی اختیار اے، جس دا استعمال صرف اوہدوں کیتا جا سکدا اے جدوں اضافی شہادت مقدمے دے منصفانہ فیصلے لئی ضروری ہووے۔
جسٹس صلاح الدین پنہور ولوں تحریر کیتے گئے فیصلے وچ آکھیا گیا اے کہ گواہ دا ابتدائی بیان، جرح تے دوبارہ بیان اک دوجے نال جڑے ہوئے مراحل نیں تے انہاں تِنہاں دا مقصد حقائق نوں مکمل طور اُتے سامنے لیانا اے۔ جرح دوران سامنے آون والے ابہام، نامکمل جواباں یا تضادات دی وضاحت لئی قانونِ شہادت دے آرٹیکل 133 دے تحت گواہ دا دوبارہ بیان لیا جا سکدا اے۔
سپریم کورٹ دے جسٹس ہاشم خان کاکڑ تے جسٹس صلاح الدین پنہور اُتے مشتمل دو رکنی بینچ نے انسداد منشیات فورس ولوں پشاور ہائیکورٹ دے فیصلے دے خلاف دائر اپیل دی اجازت بارے درخواست مسترد کردتی۔ پشاور ہائیکورٹ نے ٹرائل کورٹ دا گواہ نوں دوبارہ طلب کرن دا حکم کالعدم قرار دتا سی۔
