وزیراعلیٰ پنجاب نوں تنقید دی کوئی پرواہ نہیں: عظمیٰ بخاری

لاہور (این این آئی) وزیر اطلاعات تے ثقافت پنجاب عظمیٰ بخاری نے کامران مرتضیٰ دے بیان اُتے ردعمل دیندے ہوئے آکھیا اے کہ مریم نواز ولوں عوامی خدمت لئی کیتے گئے عملی اقدامات تے کارکردگی دی تکلیف صرف پی ٹی آئی نوں ہی نہیں بلکہ ہور وی کئی لوکاں نوں اے۔

عظمیٰ بخاری نے آکھیا کہ مریم نواز دے اقدامات اُتے پوائنٹ سکورنگ کرن لئی پی ٹی آئی ہی کافی اے، جے یو آئی ہُن پی ٹی آئی دی بی ٹیم بنن دی کوشش نہ کرے۔ بغل وچ چھری تے منہ وچ رام رام والی سیاست ہُن نہیں چلے گی۔

وزیر اطلاعات پنجاب نے آکھیا کہ پنجاب دے عوام نے مریم نواز نوں مینڈیٹ دتا اے تے عوام دے اعتماد اُتے پورا اترنا انہاں دی پہلی ترجیح اے۔ خواتین تے بچیاں دی حفاظت پنجاب حکومت دیاں ترجیحات وچ سب توں اُتے اے۔ خواتین اُتے تشدد تے بچیاں نال بدسلوکی دے واقعات کسے وی صورت برداشت نہیں کیتے جا سکدے۔

عظمیٰ بخاری نے آکھیا کہ خیبر پختونخوا وچ ناجائز قبضے چھڑوان اُتے ریاست دے خلاف غصہ کڈھن دیاں وجوہات توں اسی چنگی طرح واقف آں۔