مہنگائی وچ سالانہ بنیاد اُتے 11.32 فیصد اضافہ، پچھلے ہفتے 15 اشیاء دیاں قیمتاں ودھ گئیاں
ڈیزل، بالن والی لکڑی، ٹماٹر، آلو، پیاز، دودھ، دہی، گھی تے دال چنے سمیت 15 اشیاء مہنگیاں ہو گئیاں۔ ایل پی جی، مرغی، انڈے، چاول، چینی تے خشک دودھ دیاں قیمتاں گھٹ گئیاں، 24 اشیاء دے ریٹ مستحکم رہے: شماریات بیورو
اسلام آباد (اے پی پی) ملک وچ ضروری اشیاء دیاں قیمتاں وچ ہفتہ وار بنیاد اُتے 0.35 فیصد کمی، جدکہ سالانہ بنیاد اُتے 11.32 فیصد اضافہ ریکارڈ کیتا گیا اے۔
پاکستان شماریات بیورو دی ہفتہ وار رپورٹ دے مطابق 29 اکتوبر نوں ختم ہون والے ہفتے دوران ملک وچ روزمرہ ورتوں دیاں 12 ضروری اشیاء دیاں قیمتاں وچ کمی، 24 دیاں قیمتاں وچ استحکام، جدکہ 15 اشیاء دیاں قیمتاں وچ اضافہ ریکارڈ کیتا گیا۔
پچھلے ہفتے دوران سب توں گھٹ آمدنی والے گروپ لئی بجلی دے نرخاں وچ 3.92 فیصد، مرغی دی قیمت وچ 2.95 فیصد، انڈیاں وچ 2.81 فیصد، آٹے وچ 0.83 فیصد، ایل پی جی وچ 0.73 فیصد، کیلّیاں وچ 0.71 فیصد، چاول تے دال مسور دیاں قیمتاں وچ 0.43 فیصد، پٹرول وچ 0.39 فیصد، چینی وچ 0.35 فیصد تے خشک دودھ دی قیمت وچ 0.33 فیصد کمی ریکارڈ کیتی گئی۔
دوجے پاسے ٹماٹر دی قیمت وچ 34.91 فیصد، آلو وچ 3.27 فیصد، ڈیزل وچ 2.53 فیصد، دال چنے وچ 2.11 فیصد، بریڈ وچ 1.29 فیصد، پیاز وچ 0.62 فیصد، تازہ دودھ وچ 0.48 فیصد، دہی وچ 0.46 فیصد، ڈھائی کلو بناسپتی گھی وچ 0.29 فیصد تے بالن والی لکڑی دی قیمت وچ 0.20 فیصد اضافہ ہویا۔
سب توں گھٹ یعنی 17 ہزار 732 روپے ماہانہ تک آمدنی رکھن والے گروپ لئی قیمتاں دے حساس اشاریے وچ ہفتہ وار بنیاد اُتے 0.07 فیصد کمی ریکارڈ کیتی گئی۔
v
