فلو دی ویکسین وافر مقدار وچ موجود، 2 برانڈز دی عدم دستیابی قلت نہیں: مصطفیٰ کمال
قیمتیں ودھان دی منظوری نہ ملن اُتے امریکی تے جرمن کمپنیواں نے ویکسین درآمد نہیں کیتی، ادویات دیاں قیمتیں مقرر کرن دا اختیار وفاقی کابینہ کول اے، 52 ادویات دا معاملہ اگلے اجلاس وچ پیش ہووے گا: دنیا نیوز نال گفتگو
اسلام آباد (فوزیہ علی) وفاقی وزیر صحت مصطفیٰ کمال نے ملک وچ فلو دی ویکسین دی قلت دا تاثر مسترد کردیاں آکھیا اے کہ ملک وچ فلو دی ویکسین دی کوئی کمی نہیں، مارکیٹ وچ 2 برانڈز دیاں ویکسین دستیاب نیں تے ہور کھیپ وی پہنچ رہی اے۔ مخصوص برانڈز دی ویکسین دستیاب نہ ہون نوں قلت نہیں آکھیا جا سکدا۔
دنیا نیوز نال خصوصی گفتگو کردیاں مصطفیٰ کمال نے آکھیا کہ اس ویلے مارکیٹ وچ 2 برانڈز دیاں ویکسین دستیاب نیں۔ اگلے دو دناں وچ فلو دی ویکسین دی اک کھیپ پہنچن دی توقع اے، جدکہ اگلے چار ہفتیاں وچ تقریباً 2 لاکھ 83 ہزار خوراکاں دی اک وڈی کھیپ وی پاکستان پہنچے گی۔ وفاقی وزیر نے دسیا کہ فلو دی ویکسین دے 4 برانڈز نیں، جنہاں وچ اک امریکی، اک جرمن تے دو چینی برانڈز شامل نیں۔
امریکی تے جرمن کمپنیواں نے قیمتاں وچ اضافے لئی ہارڈ شپ کیسز دائر کیتے سن، تاہم حکومت ولوں قیمتاں وچ اضافے دی منظوری نہ ملن دے باعث انہاں کمپنیواں نے ایس وار ویکسین درآمد نہیں کیتی۔
مصطفیٰ کمال نے واضح کیتا کہ مخصوص برانڈز دی عدم دستیابی نوں ویکسین دی مجموعی قلت نہیں آکھیا جا سکدا، کیونکہ ایس بیماری توں بچاؤ لئی متبادل برانڈز دیاں ویکسیناں مارکیٹ وچ موجود نیں۔
مصطفیٰ کمال نے دسیا کہ ادویات دیاں قیمتاں وچ اضافے دا حتمی اختیار وفاقی کابینہ کول اے۔ ایس مقصد لئی وزیر خزانہ دی سربراہی وچ 5 وزیراں اُتے مشتمل کمیٹی قائم اے، جیہڑی اپنی سفارشاں کابینہ نوں پیش کردی اے۔
وفاقی وزیر دے مطابق 52 ادویات دیاں قیمتاں مقرر کرن نال متعلق کیسز نوں کمیٹی نے تقریباً منظوری دے دتی اے تے ایہہ معاملہ اگلے کابینہ اجلاس وچ پیش کیتا جاوے گا۔
