پاکستان وچ غربت دی شرح ودھ کے 29 فیصد ہو گئی

غربت ودھن دا سبب مہنگائی، وسائل دی غیر مساوی ونڈ تے مزدوراں دی گھٹدی آمدن قرار، امیر تے غریب وچ معاشی نابرابری وی ودھ گئی: عالمی بینک دی رپورٹ

لاہور (مانیٹرنگ ڈیسک) پاکستان وچ 2025ء دوران غربت دی شرح وچ اضافہ ریکارڈ کیتا گیا، جیہڑی ودھ کے 29 فیصد ہو گئی، جدوں کہ امیر تے غریب دے درمیان معاشی فرق وی ودھ گیا۔

عالمی بینک دی رپورٹ مطابق 2019ء وچ قومی سطح اُتے غربت دی شرح 22 فیصد سی، جس وچ 2025ء تک 7 فیصد اضافہ ریکارڈ کیتا گیا اے۔

بینک نے غربت وچ اضافے دیاں وجوہات مہنگائی، روزمرہ ورتوں والیاں ضروری اشیاء دیاں ودھدیاں قیمتاں، وسائل دی غیر مساوی ونڈ تے مزدوراں دی گھٹدی آمدن نوں قرار دتا اے۔

رپورٹ مطابق انہاں عوامل دا سب توں ودھ بوجھ گھٹ آمدن والے گھرانیاں اُتے پیا۔ پاکستان وچ 2024ء دوران 7 کروڑ 26 لاکھ افراد غربت دی لکیر توں تھلے زندگی گزار رہے سن۔

عالمی بینک نے اپنی رپورٹ وچ امیر تے غریب دے درمیان معاشی نابرابری وچ اضافے دا وی ذکر کیتا۔ رپورٹ مطابق نابرابری جانچن والے انڈیکس وچ پاکستان دا سکور 2018ء وچ 28 اعشاریہ 4 سی، جیہڑا 2025ء وچ ودھ کے 32 اعشاریہ 7 ریکارڈ کیتا گیا۔

رپورٹ مطابق پاکستان وچ روزانہ 3 ڈالر توں گھٹ آمدن والے افراد دی شرح 23 فیصد رہی، جیہڑی آبادی دے حساب نال 5 کروڑ 76 لاکھ توں ودھ بندی اے۔