سرکاری ہسپتالاں وچ روایتی پرچی دا نظام ختم کرن دا حکم
ایمرجنسی تے آؤٹ ڈور مریضاں نوں فوری طبی معائنے دی سہولت دِتی جاوے، متعلقہ حکام نوں اگلی سماعت اُتے تفصیلی عملدرآمد رپورٹس جمع کراؤن دی ہدایت
لاہور (کورٹ رپورٹر) لاہور ہائیکورٹ نے پنجاب دے سارے سرکاری ہسپتالاں وچ مریضاں لئی رائج روایتی پرچی سسٹم چار ہفتیاں اندر ختم کرن دا حکم دے دِتا اے۔
عدالت نے قرار دِتا کہ ایمرجنسی تے آؤٹ ڈور آؤن والے مریضاں نوں پرچی تے رجسٹریشن لئی لمیاں قطاراں وچ کھڑے رہن اُتے مجبور نہ کیتا جاوے، بلکہ انہاں نوں فوری طبی معائنے تے علاج دی سہولت فراہم کیتی جاوے۔
جسٹس جاوید اقبال وینس نے جوڈیشل ایکٹوازم پینل دی درخواست اُتے تحریری حکم جاری کردیاں محکمہ صحت پنجاب نوں سرکاری ہسپتالاں وچ مریضاں دے انتظام لئی جدید ٹیکنالوجی اُتے مبنی مؤثر نظام متعارف کراؤن دی ہدایت کیتی، تاں جو غیر ضروری تاخیر، رش تے رجسٹریشن کاؤنٹرز اُتے لمیاں قطاراں دا خاتمہ ممکن بنایا جا سکے۔
عدالتی حکم دے مطابق سرکاری ہسپتالاں وچ بنیادی طبی سہولتاں دی عدم دستیابی نال متعلق درخواست 2020ء توں زیرِ سماعت اے، تاہم عدالت دے کئی نوٹسز تے ہدایات دے باوجود ہن تک کسے وی فریق نے عملدرآمد رپورٹ جمع نہیں کرائی۔
عدالت نے قرار دِتا کہ عدالتی احکامات اُتے مسلسل عمل نہ کرنا متعلقہ حکام دے غیر سنجیدہ تے لاپرواہ رویے دا عکاس اے۔
سماعت دوران سپیشل سیکرٹری صحت نبیلہ عرفان نے یقین دہانی کرائی کہ پنجاب دے سرکاری ہسپتالاں وچ چار ہفتیاں دے اندر روایتی پرچی سسٹم ختم کرکے جدید مریض مینجمنٹ سسٹم متعارف کرا دِتا جاوے گا۔
عدالت نے محکمہ صحت نوں ہسپتالاں وچ دستیاب طبی سہولتاں، انہاں دے معیار تے بہتری لئی کیتے گئے اقدامات بارے جامع رپورٹ وی پیش کرن دی ہدایت کیتی۔
ہائیکورٹ نے متعلقہ حکام نوں اگلی سماعت اُتے تفصیلی عملدرآمد رپورٹس جمع کراؤن دا حکم دیندیاں واضح کیتا کہ عدالتی احکامات اُتے بلاجواز عمل نہ کرن والے افسران خلاف قانونی کارروائی وی کیتی جا سکدی اے۔
