افغان طالبان رجیم نے دہشت گردی دی حمایت بند نہ کیتی تاں بھاری قیمت چکانی پئے گی: ترجمان پاک فوج
بھارت پاکستان وچ دہشت گردی دا وڈا سرپرست، افغان رجیم بھارتی پراکسی دے طور اُتے کم کر رہی اے، نور ولی، بشیر زیب تے گل بہادر ورگے دہشت گرداں نوں پناہ دے رکھی اے: لیفٹیننٹ جنرل احمد شریف
بامعنی مذاکرات لئی افغان طالبان اپنی سرزمین توں سرگرم دہشت گرد گروہاں خلاف ٹھوس کارروائیاں کرن دا عزم ظاہر کرن: ترجمان دفتر خارجہ، مارکو روبیو دے بیان دا خیرمقدم
راولپنڈی ڈی جی آئی ایس پی آر لیفٹیننٹ جنرل احمد شریف چودھری نے آکھیا اے کہ افغان طالبان نے پاکستان وچ دہشت گردی دی حمایت بند نہ کیتی تاں بھاری قیمت چکانی پئے گی۔
عالمی خبر رساں ادارے ’رائٹرز‘ نوں دتے گئے انٹرویو دیاں جاری تفصیلات دے مطابق لیفٹیننٹ جنرل احمد شریف چودھری دا کہنا سی کہ بھارت پاکستان وچ دہشت گردی دا سب توں وڈا سرپرست اے، جدکہ افغان طالبان رجیم بھارت دی پراکسی دے طور اُتے کم کر رہی اے۔
اُنہاں آکھیا کہ دہشت گرد تنظیمیں تحریک طالبان پاکستان (ٹی ٹی پی) تے بلوچستان لبریشن آرمی (بی ایل اے) وی پاکستان خلاف بھارتی پراکسی نیں، افغان طالبان اپنے مذموم مقاصد لئی غیر ریاستی عناصر تے کرائے دے جنگجوواں نوں استعمال کر رہے نیں۔
ترجمان پاک فوج دا کہنا سی کہ افغانستان اج وی غیر ریاستی عناصر دے زیرِ اثر اے تے اتھے اک رجیم قائم اے۔ افغانستان وچ روسی مداخلت توں بعد کئی انٹیلی جنس ایجنسیاں تے پراکسی گروپاں نے اپنی جڑھاں مضبوط کر لئیاں۔ جیش العدل، القاعدہ تے داعش خراسان (آئی ایس کے پی) ورگیاں بین الاقوامی دہشت گرد تنظیمیں وی افغانستان وچ موجود نیں۔ انہاں حقائق دی نشاندہی اقوام متحدہ، امریکہ تے کئی ہور ملک وی کر چکے نیں۔
لیفٹیننٹ جنرل احمد شریف چودھری نے آکھیا کہ پاکستان افغان طالبان توں صرف ایہہ مطالبہ کردا اے کہ اوہ پاکستان اندر دہشت گرداں دی حمایت بند کرن۔ افغان طالبان رجیم نے نور ولی محسود، بشیر زیب تے گل بہادر ورگے دہشت گرداں نوں پناہ دے رکھی اے۔ پاکستان وچ دہشت گردی لئی دہشت گرداں دے جتھے افغانستان توں آندے نیں تے انہاں نوں اتھوں ہی اسلحہ وی فراہم کیتا جاندا اے۔
ڈی جی آئی ایس پی آر نے خبردار کیتا کہ جے افغان طالبان رجیم نے دہشت گردی بارے پاکستان دے تحفظات تے مطالبے تسلیم نہ کیتے تاں اُنہاں نوں سنگین قیمت چکانی پئے گی۔
اُنہاں دا کہنا سی کہ افغان طالبان رجیم دی عالمی سطح اُتے کوئی ساکھ نہیں، بین الاقوامی برادری نوں چاہیدا اے کہ اوہ اس نوں اک معمول دی ریاست وانگ رویہ اختیار کرن اُتے مجبور کرے۔
ترجمان پاک فوج نے عالمی برادری اُتے زور دتا کہ افغان طالبان نوں منشیات دی کاشت تے پیداوار روکّن لئی وی مجبور کیتا جاوے۔
لیفٹیننٹ جنرل احمد شریف چودھری نے واضح کیتا کہ پاکستان دیاں مسلح افواج افغانستان ولوں پیدا ہون والے سارے خطریاں، بشمول ڈرون حملیاں دا مؤثر مقابلہ کرن تے انہاں دا سدباب کرن دی بھرپور صلاحیت رکھدیاں نیں۔
اسلام آباد (دنیا نیوز) ترجمان دفتر خارجہ نے امریکی وزیر خارجہ مارکو روبیو دے بیان دا خیرمقدم کردیاں آکھیا اے کہ پاکستان افغانستان نال مذاکرات وچ سہولت کاری لئی امریکہ سمیت سارے دوست ملکاں دیاں مخلصانہ کوششاں دا خیرمقدم کرے گا۔
وفاقی دارالحکومت توں جاری ترجمان دفتر خارجہ دے بیان مطابق بامعنی مذاکرات لئی ضروری اے کہ افغان طالبان حکام واضح عزم ظاہر کرن کہ اوہ اپنی سرزمین توں سرگرم دہشت گرد گروہاں خلاف ٹھوس کارروائیاں کرن گے۔
ترجمان نے آکھیا کہ افغان سرزمین توں سرگرم تحریک طالبان پاکستان (ٹی ٹی پی)، فتنۃ الخوارج (ایف اے کے)، بلوچستان لبریشن آرمی (بی ایل اے)، فتنۃ الہندوستان (ایف اے ایچ) تے ہور دہشت گرد گروہاں خلاف قابلِ تصدیق کارروائیاں کرناں ہوون گیاں۔
دوجے پاسے دفتر خارجہ دے ترجمان دا کہنا سی کہ پاکستان تعمیری رابطیاں لئی بدستور تیار اے، تاہم انہاں رابطیاں دے نتیجے وچ پاکستان دے جائز سکیورٹی خدشات دور کرن لئی عملی تے ٹھوس پیش رفت ہونا ضروری اے۔
