اسحاق ڈار دا ازبکستان تے مالدیپ دے وزرائے خارجہ نال رابطہ.
شنگھائی تعاون تنظیم دے معاملات، علاقائی صورتحال سمیت ہور امور اُتے تبادلہ خیال، وزرائے خارجہ دا دوطرفہ تعلقات نوں ہور مستحکم کرن تے باہمی تعاون ودھاؤن دے عزم دا اعادہ۔
اسلام آباد (وقائع نگار، مانیٹرنگ ڈیسک) نائب وزیراعظم تے وزیر خارجہ محمد اسحاق ڈار نے ازبکستان دے وزیر خارجہ بختیار سعیدوف تے مالدیپ دی وزیر خارجہ اریتھشام آدم نال ٹیلی فون اُتے رابطہ کیتا اے، جس دوران شنگھائی تعاون تنظیم (ایس سی او) دے معاملات، علاقائی صورتحال تے دوطرفہ تعلقات بارے تبادلہ خیال کیتا گیا۔
ترجمان دفتر خارجہ دے مطابق اسحاق ڈار نے ازبک وزیر خارجہ بختیار سعیدوف نال گفتگو دوران ازبکستان نوں 2026-27 لئی ایس سی او کونسل آف ہیڈز آف گورنمنٹ دی چیئرپرسن شپ سنبھالن اُتے مبارکباد دتی تے پاکستان ولوں مکمل حمایت تے تعاون دی یقین دہانی کرائی۔
ترجمان دفتر خارجہ دے مطابق دوناں رہنماواں نے خطے دی مجموعی صورتحال اُتے وی تبادلہ خیال کیتا، جدکہ ازبک وزیر خارجہ بختیار سعیدوف نے علاقائی امن تے سلامتی دے فروغ لئی پاکستان دیاں مسلسل کوششاں نوں سراہیا۔
ٹیلی فونک گفتگو دے اختتام اُتے دوناں وزرائے خارجہ نے دوطرفہ دوستانہ تعلقات نوں ہور مضبوط بناؤن تے مختلف شعبیاں وچ باہمی تعاون اگے ودھاؤن دے عزم دا اعادہ کیتا۔
علاوہ ازیں ٹیلی فونک گفتگو دوران مالدیپ دی وزیر خارجہ اریتھشام آدم نے مالدیپ دے صدر تے انہاں دے وفد دے حالیہ دورہ اسلام آباد موقعے اُتے پاکستان ولوں پرتپاک استقبال تے مہمان نوازی اُتے شکریہ ادا کیتا۔
اس موقعے اُتے دوناں ملکاں نے دوطرفہ تعاون نوں ہور وسعت دین تے قریبی رابطے برقرار رکھن اُتے وی اتفاق کیتا۔ گفتگو دوران دولتِ مشترکہ دے سربراہانِ حکومت دے آئندہ اجلاس دے ایجنڈے اُتے وی تبادلہ خیال کیتا گیا۔
