چین دا طرزِ حکمرانی پاکستان لئی رہنمائی فراہم کر سکدا اے: یوسف رضا

پاک چین ریسرچ سینٹر دا افتتاح، پارلیمانی تعاون تے ادارہ جاتی رابطے مضبوط بنانے اُتے زور، دوستی صرف ورثہ ہی نہیں بلکہ مستقبل لئی سانجھی ذمہ واری وی اے: چیئرمین سینیٹ

اسلام آباد (اپنے رپورٹر توں) چیئرمین سینیٹ سید یوسف رضا گیلانی نے پاکستان تے چین دے درمیان پارلیمانی تعاون، ادارہ جاتی رابطیاں تے باہمی تجربیاں دے تبادلے نوں ہور فروغ دین دی لوڑ اُتے زور دیندیاں آکھیا اے کہ چین دا طرزِ حکمرانی، ادارہ جاتی ترقی، لمبے عرصے دی منصوبہ بندی تے معاشی تبدیلی دا تجربہ پاکستان دے قانون ساز تے پالیسی ساز اداریاں نوں مضبوط بناؤن لئی قیمتی رہنمائی فراہم کر سکدا اے۔

پاکستان چائنا ریسرچ سینٹر فار پارٹی اینڈ سٹیٹ گورننس دی افتتاحی تقریب وچ مہمانِ خصوصی دے طور اُتے خطاب کردیاں چیئرمین سینیٹ نے آکھیا کہ پاکستان تے چین دی دوستی باہمی احترام، اعتماد تے عوامی رابطیاں دیاں مضبوط بنیاداں اُتے قائم اے، جس نوں ہور مضبوط بناؤن لئی پارلیمانی تے ادارہ جاتی سطح اُتے تعاون بہت ضروری اے۔

آخر وچ چیئرمین سینیٹ نے آکھیا کہ پاکستان تے چین دی دوستی صرف ماضی دا ورثہ نہیں، بلکہ مستقبل لئی سانجھی ذمہ واری وی اے۔ اوہناں ایس دیرینہ تعلق نوں ہور مضبوط بناؤن تے آون والیاں نسلاں تک نویں عزم تے جذبے نال پہنچاؤن لئی پارلیمانی رابطیاں تے ادارہ جاتی تعاون نوں ہور وسیع کرن دی لوڑ اُتے زور دتا۔