بلاول تے مراد شاہ ولوں گلگت بلتستان دے یومِ آزادی اُتے عوام نوں مبارکباد
عوام دیاں قربانیاں تے بہادری تاریخ دا قابلِ فخر باب نیں: چیئرمین پی پی، وزیراعلیٰ سندھ
پیپلز پارٹی عوامی حقاں، سیاسی خودمختیاری تے ترقی دی جدوجہد جاری رکھے گی: فریال، شرمیلا
کراچی (خبر ایجنسیاں) پاکستان پیپلز پارٹی دے چیئرمین بلاول بھٹو زرداری تے وزیراعلیٰ سندھ سید مراد علی شاہ نے گلگت بلتستان دے 79ویں یومِ آزادی اُتے عوام نوں دلی مبارکباد پیش کردیاں آکھیا اے کہ یکم نومبر گلگت بلتستان دی تاریخ دا اک روشن، یادگار تے قابلِ فخر دن اے، جیہڑا اتھوں دے عوام دی بہادری، لازوال قربانیاں تے آزادی دے غیرمتزلزل عزم دی علامت اے۔
بیان مطابق بلاول بھٹو زرداری نے اپنے پیغام وچ آکھیا کہ گلگت بلتستان دے عوام دی تاریخی جدوجہد تے قربانیاں ساڈی قومی تاریخ دا قابلِ فخر باب نیں، جنہاں نوں ہمیشہ یاد رکھیا جائے گا۔ اوہناں آکھیا کہ گلگت بلتستان اپنی وکھری ثقافت، شاندار روایتاں تے قدرتی حسن دی وجہ توں پاکستان دا اک قیمتی اثاثہ اے۔
اپنے پیغام وچ وزیراعلیٰ سندھ نے آکھیا کہ گلگت بلتستان دے عوام دیاں قربانیاں، بہادری تے عزم ساڈی قومی تاریخ دا قابلِ فخر باب نیں۔ گلگت بلتستان پاکستان دا اہم حصہ تے قومی اتحاد تے یکجہتی دی خوبصورت علامت اے۔
گلگت بلتستان دی وکھری ثقافت، روایتاں تے قدرتی حسن پاکستان دی قومی پہچان دا قیمتی سرمایہ نیں۔
اپنے پیغام وچ فریال تالپور نے آکھیا کہ خطے دے بہادر عوام نے ڈوگرہ راج دے ظالمانہ تسلط دے خلاف جدوجہد کرکے آزادی حاصل کیتی۔
اوہناں دی دلیری، قربانیاں تے غیرمتزلزل عزم پاکستان دی قومی تاریخ دا قابلِ فخر سرمایہ نیں۔ صدر زرداری نے اپنے پہلے دورِ صدارت وچ اصلاحاتی پیکیج دے ذریعے گلگت بلتستان نوں نویں سیاسی شناخت، منتخب اسمبلی تے صوبائی طرز دا بااختیار انتظامی ڈھانچہ فراہم کیتا۔ پیپلز پارٹی عوامی حقاں، سیاسی خودمختیاری تے ترقی دی جدوجہد جاری رکھے گی۔
شرمیلا فاروقی نے آکھیا کہ گلگت بلتستان دی آزادی بہادر عوام دی لمبی جدوجہد، عزم تے قربانیاں دا نتیجہ اے۔ اتھوں دیاں خواتین نے وی آزادی دی جدوجہد، خطے دی تاریخ تے سماجی ترقی وچ نمایاں کردار ادا کیتا۔
اوہناں دا کہنا سی کہ شہید محترمہ بینظیر بھٹو نے گلگت بلتستان دے عوام دی سیاسی نمائندگی ودھاؤن لئی قانون ساز کونسل دے قیام دا اہم قدم چکیا، جس نال خطے وچ سیاسی بااختیاری دے عمل نوں تقویت ملی۔
اوہناں آکھیا کہ پاکستان پیپلز پارٹی دا ہمیشہ توں ایہہ مؤقف رہیا اے کہ گلگت بلتستان دے عوام نوں فیصلہ سازی، حکومتی امور تے ترقیاتی عمل وچ مؤثر نمائندگی تے بھرپور حصہ ملنا چاہیدا اے۔
