عالمی منڈی وچ پٹرولیم دیاں قیمتاں گھٹدیاں ای عوام نوں ریلیف دیا جاوے گا: علی پرویز
توانائی دی ورتوں وچ معمولی احتیاط وی قیمتی زرمبادلہ دی بچت دا ذریعہ بن سکدی اے۔ ایندھن دیاں قیمتاں مقرر کرن دے طریقۂ کار وچ شفافیت برتی گئی: نجی یونیورسٹی وچ خطاب
لاہور (مانیٹرنگ ڈیسک) وفاقی وزیر پٹرولیم علی پرویز ملک نے سردیاں دے موسم وچ توانائی دی غیر ضروری ورتوں توں گریز تے بچت نوں فروغ دین اُتے زور دیندے ہوئے آکھیا کہ توانائی دی ورتوں وچ معمولی احتیاط وی قیمتی زرمبادلہ دی بچت دا ذریعہ بن سکدی اے۔ ایران تے امریکہ وچ کشیدگی دی وجہ نال عالمی منڈی وچ پٹرولیم مصنوعات دیاں قیمتاں متاثر ہوئیاں۔ عالمی منڈی وچ پٹرولیم مصنوعات دیاں قیمتاں گھٹدیاں ای عوام نوں وی فوری ریلیف دتا جاوے گا۔
نجی یونیورسٹی دے کانووکیشن نال خطاب کردیاں وفاقی وزیر نے آکھیا کہ مقبول فیصلے کرن دی بجائے ملکی زرمبادلہ دی حفاظت نوں ترجیح دتی گئی۔
پٹرولیم قیمتاں وچ اضافے دے اثرات گھٹاؤن لئی مخصوص طبقیاں نوں سبسڈی دتی گئی۔ اسیں اپنے وسائل اوہناں لوکاں اُتے خرچ کرکے انہاں نوں تحفظ دتا، جیہڑے ایس دے سب توں ودھ حقدار سن۔ اس طرح آبنائے ہرمز دے بحران دا دوجے ملکاں دے مقابلے وچ گھٹ نقصان نال سامنا کیتا۔
آبنائے ہرمز دا بحران اپنی شدت تے وسعت دے لحاظ نال غیر معمولی رہیا اے تے ایس دے مسلسل جاری رہن نال مختلف ملکاں دی صلاحیت دا امتحان ہویا اے۔ الحمدللہ پاکستان نے اوہ معاشی استحکام برقرار رکھیا اے، جیہڑا حاصل کرن لئی ساریاں نے محنت کیتی۔
اُنہاں آکھیا کہ ملک وچ ایندھن دیاں قیمتاں مقرر کرن دے طریقۂ کار وچ شفافیت لیاندی گئی اے تے ساریاں تفصیلاں عوام دے سامنے رکھیاں گئیاں نیں۔
