ایل پی جی ایسوسی ایشنز ولوں 16 نومبر توں ملک گیر ہڑتال دا اعلان
حکومتی قیمتاں مقرر کرن دا فارمولا مسترد، قیمتاں وچ 30 فیصد تک اضافہ ہو سکدا اے: علی حیدر
مجوزہ پالیسی نجی شعبے دی مشاورت توں بغیر تیار کیتی گئی: سینئر وائس چیئرمین
کراچی (مانیٹرنگ ڈیسک) مائع پٹرولیم گیس (ایل پی جی) ایسوسی ایشنز نے حکومت ولوں قیمتاں مقرر کرن دے نویں فارمولے نوں مسترد کردیاں 16 نومبر توں ملک گیر ہڑتال دا اعلان کر دتا اے۔
ایس حوالے نال ایل پی جی مارکیٹس ایسوسی ایشن دے سینئر وائس چیئرمین علی حیدر نے میڈیا نال گل بات کردیاں آکھیا کہ حکومت دا نواں پرائسنگ فارمولا قبول نہیں، ایس نال ایل پی جی دیاں قیمتاں وچ 25 توں 30 فیصد تک اضافہ ہو سکدا اے۔ ساریاں ایسوسی ایشنز دے ہنگامی اجلاس وچ حکومتی فارمولے دے خلاف ہڑتال دا فیصلہ کیتا گیا اے۔
اُنہاں مزید آکھیا کہ پاکستان ہر سال تقریباً 13 لاکھ ٹن ایل پی جی درآمد کردا اے۔ وزیراعظم نوں بھیجی گئی مجوزہ پالیسی نجی شعبے دی مشاورت توں بغیر تیار کیتی گئی اے۔
علی حیدر نے مقامی طور اُتے تیار ہون والی ایل پی جی اُتے عائد پٹرولیم لیوی دے استعمال بارے سوال چُکدیاں آکھیا کہ ارباں روپے دی لیوی جمع ہون دے باوجود سرکاری ادارے موجودہ قلت دوران سپلائی یقینی بناؤن وچ ناکام رہے نیں۔
