اج مڈٹرم الیکشن: ٹرمپ دے سر اُتے شکست دی تلوار، اتحادیوں نوں صدارتی معافیاں دین دا فیصلہ

ڈیموکریٹس ایلون مسک سمیت ٹرمپ دے قریبی اتحادیواں نوں تحقیقات دا نشانہ بنا سکدے نیں، گرفتاری دا وی خدشہ، ایہ محض گلاں نیں، جے ایہو جیہا اے تاں سانوں انہاں دا تحفظ کرنا ہووے گا: امریکی صدر، میں مسٹر ویٹو بن جاواں گا، اک دو مہینے مسلسل ویٹو کرن توں بعد اوہ میرے کول آون گے تے اسیں کوئی سمجھوتا کر لاواں گے، ٹرمپ نے ڈیموکریٹس دے ناپسندیدہ قانوناں دا حل لبھ لیا

واشنگٹن (اے ایف پی) امریکی صدر ڈونلڈ ٹرمپ نے کانگریس اُتے ری پبلکنز دا کنٹرول ختم ہون دے خدشے دے پیش نظر اپنے اتحادیواں نوں وڈے پیمانے اُتے صدارتی معافیاں دین دا اشارہ دِتا اے، جدکہ خبردار کیتا اے کہ اوہ آئندہ کانگریس ولوں منظور کیتے جان والے ڈیموکریٹس دے کسے وی ناپسندیدہ قانون نوں ویٹو کر دین گے۔

نیویارک پوسٹ دے پوڈکاسٹ ’’پوڈ فورس ون‘‘ وچ گل بات کردیاں ٹرمپ نے وسط مدتی انتخابات توں بعد اپنی حکمت عملی دا خاکہ پیش کیتا۔ انہاں دا کہنا سی کہ اوہ اپنے اتحادیواں نوں دھڑا دھڑ صدارتی معافیاں دین گے۔

انتخابی جائزیاں دے مطابق جے ڈیموکریٹس کانگریس دے اک یا دوناں ایواناں دا کنٹرول حاصل کر لیندے نیں تاں انہاں نوں ٹرمپ انتظامیہ دے موجودہ تے سابق عہدیداراں دے طرزِ عمل دیاں تحقیقات تے سماعتاں کرن دے وسیع اختیارات مل جان گے۔

ایس توں علاوہ قانون سازی دا ایجنڈا وی ڈیموکریٹس دے ہتھ وچ آ جاوے گا تے اوہ اپنی ترجیحات دے مطابق بل منظور کروا سکدے نیں۔ ایس صورتحال نال ٹرمپ لئی ہور مشکلات پیدا ہو سکدیاں نیں، جنہاں نوں ہن تک کانگریس دے دوناں ایواناں وچ ری پبلکنز دی مکمل حمایت حاصل رہی اے۔

تاہم ٹرمپ نے واضح کر دِتا اے کہ آئندہ کانگریس ولوں منظور ہون والی کوئی وی ایسی قانون سازی، جس نال اوہ اتفاق نہیں کردے، اوہنوں ویٹو کر دین گے۔

پوڈکاسٹ دی میزبان نے امکان ظاہر کیتا کہ ڈیموکریٹس ٹرمپ دے قریبی اتحادیواں نوں وی تحقیقات دا نشانہ بنا سکدے نیں، جنہاں وچ دنیا دے امیر ترین شخص ایلون مسک وی شامل نیں۔ انہاں نوں ٹرمپ انتظامیہ دے ابتدائی دور وچ ہزاراں سرکاری ملازماں نوں فارغ کرن تے مختلف سرکاری پروگراماں دی فنڈنگ وچ وڈی پیمانے اُتے کٹوتیاں کرن دی کھلی چھوٹ دِتی گئی سی۔ مسک نوں گرفتاری دا سامنا وی کرنا پے سکدا اے۔

ایس اُتے ٹرمپ نے جواب دِتا کہ ایہ محض گلاں نیں، پر جے ایہو جیہیاں گلاں ہو رہیاں نیں تاں سانوں انہاں دا تحفظ کرنا ہووے گا۔

ڈیموکریٹس کافی عرصے توں ٹرمپ دی دوجی مدتِ صدارت دوران اخلاقی ضابطیاں دی خلاف ورزیاں تے مفادات دے ٹکراؤ اُتے سوال چکدے رہے نیں۔ ایس دوران صدر تے انہاں دے خاندان دی ذاتی دولت وچ وی نمایاں اضافہ ہویا اے۔

کانگریس دیاں تحقیقات دے نتیجے وچ براہِ راست فوجداری مقدمے قائم نہیں کیتے جا سکدے، تاہم تحقیقاتی کمیٹیاں متعلقہ افراد نوں بیان دین تے ثبوت فراہم کرن اُتے مجبور کر سکدیاں نیں۔

حاصل ہون والے ثبوت مزید کارروائی لئی محکمہ انصاف نوں وی بھیجے جا سکدے نیں، تاہم محکمہ انصاف بدستور ٹرمپ دے زیرِ کنٹرول رہے گا، ایس لئی انہاں تحقیقات دے نتیجے وچ فوجداری مقدمے قائم ہون دا امکان گھٹ نظر آندا اے۔

ایس دے باوجود جے کوئی مقدمہ قائم نہ وی ہووے تاں ایسی تحقیقات تے کانگریس وچ ہون والیاں سماعتاں سیاسی طور اُتے صدر تے انہاں دے اتحادیواں لئی مشکلات پیدا کر سکدیاں نیں۔

ٹرمپ نے پچھلے دو سالاں دوران اپنی حکومتی کارکردگی نوں وڈی کامیابی قرار دِتا، تاہم پوڈکاسٹ وچ آکھیا کہ ایہ پیش رفت ایسے لوکاں دے اقتدار وچ آؤن نال متاثر ہو سکدی اے، جیہڑے ساڈے ملک نال نفرت کردے نیں۔ انہاں دا اشارہ منگل نوں منتخب ہون والے ممکنہ ڈیموکریٹ ارکان ول سی۔

ٹرمپ نے آکھیا کہ میں مسٹر ویٹو بن جاواں گا۔ انہاں دا کہنا سی کہ اوہ بل منظور کرکے میرے کول بھیج دے رہن گے تے میں انہاں نوں ویٹو کردا رہواں گا۔ آخرکار اک یا دو مہینے مسلسل ویٹو ہون توں بعد اوہ میرے کول آون گے تے اسیں کوئی سمجھوتا کر لاواں گے۔

امریکی کانگریس صدر دے ویٹو نوں دوناں ایواناں وچ دو تہائی اکثریت نال مسترد کر سکدی اے، تاہم جے ڈیموکریٹس نوں ایواناں وچ معمولی اکثریت حاصل ہوئی تاں صدر دے ویٹو نوں ناکام بنانا انہاں لئی اک وڈا چیلنج ہووے گا۔