پیٹرول اُتے 15 روپے فی لیٹر دا بوجھ ریفائنریز نوں منتقل، قیمت مقرر کرن دا فارمولا 30 دناں لئی تبدیل، فیول ریلیف سکیم برقرار، گیس دیاں ودھیک قیمتاں خلاف 2 دناں وچ اقدامات سامنے آون گے: وزرا
ریفائنریز نے 3 مہینیاں دے اندر اینا منافع کمایا جو سالاں وچ وی نہیں ملیا، عوام نوں ریلیف دین لئی انہاں نے 15 ارب دا بوجھ چکیا، حکومت نے پیسہ لے کے اپنا خسارہ پورا نہیں کیتا بلکہ عوام وچ ونڈیا: علی پرویز ملک، گیس دی 6، 7 سو روپے فی کلو قیمت غلط اے، عوام نوں تکلیف دین والیاں نوں حساب دینا پئے گا، مارکیٹ نارمل ہوندیاں ہی سارا نظام جلد بہتر کراں گے: وزیر پیٹرولیم، عوام اُتے گھٹ توں گھٹ بوجھ منتقل کرنا وزیراعظم دا مشن اے: عطا تارڑ
اسلام آباد (نامہ نگار، مانیٹرنگ ڈیسک) وفاقی وزرا علی پرویز ملک تے عطا اللہ تارڑ نے آکھیا اے کہ جمعہ نوں پیٹرول دی قیمت وچ 15 روپے اضافہ ہونا سی، تاہم وزیراعظم دی ہدایت اُتے ایہ بوجھ عوام اُتے منتقل کرن دی بجائے ریفائنریز اُتے منتقل کر دِتا گیا اے۔ پیٹرول دی قیمت مقرر کرن دا فارمولا 30 دناں لئی تبدیل کر دِتا گیا اے، جدکہ ریفائنریز ماہانہ تقریباً 15 ارب روپے دا مالی بوجھ برداشت کرن گیاں۔ گیس دیاں ودھیک قیمتاں خلاف 2 دناں وچ اقدامات سامنے آ جان گے۔
وزیر پیٹرولیم علی پرویز ملک نے عطا تارڑ دے نال پریس کانفرنس کردیاں آکھیا کہ عالمی سطح اُتے توانائی دیاں قیمتاں وچ اضافے دے پاکستانی معیشت اُتے وی اثرات مرتب ہوئے نیں۔ پاکستان نوں معاشی تے توانائی دے شعبیاں وچ مشکلات دا سامنا اے۔
عالمی منڈیاں وچ قیمتاں ودھن دا سلسلہ جاری اے، انشورنس تے لاجسٹکس دے اخراجات ودھ رہے نیں، جدکہ خطے وچ کشیدہ صورتحال دی وجہ نال وی مشکلات دا سامنا اے۔
وفاقی وزیر نے آکھیا کہ اک کروڑ 30 لاکھ توں ودھ صارفین پیٹرولیم مصنوعات اُتے ریلیف توں فائدہ حاصل کر رہے نیں۔ حکومت کسے نال وی زیادتی نہیں کرنا چاہندی بلکہ شفاف طریقے نال بین الاقوامی بحران توں نکلنا چاہندی اے۔
انہاں آکھیا کہ خطے دی صورتحال دے پیش نظر نقل و حمل دے اخراجات وچ وی اضافہ ہویا اے۔ عوام نوں ریلیف دینا وزیراعظم دیاں اہم ترجیحات وچ شامل اے تے حکومت نے عوامی ریلیف لئی فیول سبسڈی سکیم شروع کیتی اے۔
انہاں نے آکھیا کہ مشکل وقت وچ عوام نوں ریلیف دین لئی آئل ریفائنریز توں تعاون دی درخواست کیتی گئی اے۔ آئل ریفائنریز دے تعاون نال عوام نوں 15 روپے فی لیٹر سستا پیٹرول فراہم کرن دے قابل ہوواں گے۔ ریفائنریز دی مدد نال پیٹرول دیاں قیمتاں برقرار رکھیاں گئیاں نیں۔
وزیر پیٹرولیم نے آکھیا کہ ریفائنریز نے 3 مہینیاں دے اندر اینا منافع کمائیا اے جیہڑا انہاں نے سالاں وچ وی نہیں کمائیا سی۔ جمعہ دے روز پیٹرول دیاں قیمتاں وچ 15 روپے اضافہ ہونا سی، پر ریفائنریز نے تعاون کیتا تے حکومت دے نال مل کے 15 ارب روپے دا بوجھ چکیا اے۔
وزیر پیٹرولیم نے آکھیا کہ پیٹرولیم اُتے پریمیم وچ 10 توں 20 ڈالر فی بیرل اضافہ ہو رہیا اے۔ جنگ توں پہلاں پیٹرول اُتے پریمیم 5 ڈالر سی، جیہڑا ودھ کے 20 ڈالر فی بیرل تک پہنچ گیا۔ ڈیزل اُتے خام تیل والا فارمولا لاگو اے، جدکہ مقامی ریفائنریز 30 فیصد پیٹرول پیدا کردیاں نیں۔
انہاں آکھیا کہ عوام نے تیل دیاں قیمتاں دے معاملے وچ بہت مشکلات برداشت کیتیاں نیں۔ حکومت کسے نال زیادتی نہیں کرے گی تے عوام دا تحفظ یقینی بنائے گی۔
انہاں دا کہنا سی کہ اج گیس دی جیہڑی قیمت 6، 7 سو روپے فی کلو وصول کیتی جا رہی اے، ایہ غلط اے۔ گیس دیاں ودھیک قیمتاں وصول کرن خلاف اقدامات کیتے جا رہے نیں، جیہڑے اک دو دناں وچ سامنے آ جان گے۔ جیہڑے لوک گیس دیاں قیمتاں دے ذریعے عوام نوں تکلیف دے رہے نیں، انہاں نوں حساب دینا پئے گا۔
انہاں آکھیا کہ حکومت نے پیسہ لے کے اپنا خسارہ پورا نہیں کیتا بلکہ عوام وچ ونڈیا اے۔ سارے رل مل کے بوجھ چکن دے نظام دے ذریعے ہی اگے ودھ رہے آں۔ ایل این جی دے جہاز اُتے حملہ کیتا گیا، ساڈے کول ایل پی جی دے 2 ٹرمینل موجود نیں، انہاں نوں استعمال کراں گے۔
علی پرویز ملک نے آکھیا کہ جیویں ہی مارکیٹ نارمل ہووے گی، سارا نظام جلد بہتر کر دِتا جاوے گا۔ ایہ فارمولا صرف 30 دناں لئی لاگو رہے گا۔ ایس وقت خطے وچ بدترین جنگ جاری اے، جنگ ختم ہون توں بعد سیکٹر نوں ڈی ریگولیٹ کر دِتا جاوے گا۔
ایس موقع اُتے وفاقی وزیر اطلاعات عطا تارڑ نے آکھیا کہ دنیا بھر دی طرح خطے دی صورتحال نال پاکستان دی معیشت وی متاثر ہوئی اے، تاہم حکومت عوام نوں ریلیف فراہم کرن لئی اقدامات کر رہی اے۔
انہاں آکھیا کہ وزیراعظم دا پہلے دن توں ایہ وژن سی کہ پیٹرولیم مصنوعات دیاں قیمتاں وچ اضافے دا گھٹ توں گھٹ بوجھ عوام اُتے پایا جاوے۔ دنیا بھر دی طرح خطے دی صورتحال نال پاکستانی معیشت وی متاثر ہوئی اے۔ باب المندب تے آبنائے ہرمز دی صورتحال دا ہر ملک دی معیشت اُتے اثر پیا اے۔
انہاں آکھیا کہ پاکستان دی معیشت اُتے وی اثرات مرتب ہوئے نیں، پر ساڈے میکرو اکنامک انڈیکیٹرز بہتر رہے نیں۔
وزیر اطلاعات نے آکھیا کہ عوام نوں ریلیف دین لئی فیول ریلیف سکیم جاری رہے گی۔ موٹر سائیکلاں، چنگ چی رکشیاں تے چھوٹیاں گاڑیاں لئی ریلیف سکیم شروع کیتی گئی اے۔ فیول سبسڈی سکیم لئی متعلقہ محکماں نے رل کے اقدامات کیتے نیں تے حکمت عملی دے ذریعے پیٹرولیم مصنوعات دیاں قیمتاں وچ ہور اضافہ روکیا گیا اے۔
انہاں آکھیا کہ جمعہ نوں پیٹرول دی قیمت وچ 15 روپے اضافہ ہونا سی، پر وزیراعظم دی ہدایت اُتے ایہ بوجھ ریفائنریز اُتے پا دِتا گیا۔ عوام اُتے گھٹ توں گھٹ بوجھ منتقل کرنا وزیراعظم دا مشن اے۔
وزیر اطلاعات نے آکھیا کہ وزیراعظم فیول ریلیف ورگا نظام وضع کرنا آسان کم نہیں سی۔ وزیراعظم فیول ریلیف سکیم دے تحت ڈیڑھ کروڑ توں ودھ رجسٹریشن ہو چکیاں نیں۔ اینی وڈی تعداد وچ لوکاں دی رجسٹریشن تے انہاں نوں سستا تیل فراہم کرنا سکیم دی کامیابی دا وڈا ثبوت اے۔ ہن تک سکیم دے تحت 27 ارب روپے ریلیف دی مد وچ دِتے جا چکے نیں۔
آئل ریفائنریز نے عوام نوں ریلیف فراہم کرن لئی 15 ارب روپے دا بوجھ برداشت کیتا اے۔
یاد رہے کہ وفاقی حکومت نے ریفائنریز لئی پیٹرول دی قیمت مقرر کرن دا فارمولا تبدیل کر دِتا اے۔ پیٹرولیم ڈویژن دے مطابق وفاقی کابینہ نے نویں طریقہ کار دی منظوری دے دِتی اے۔
حکومت نے آئل ریفائنریز نوں ہدایت کیتی اے کہ درآمدی قیمت تے ریفائنری دی سطح اُتے مقررہ قیمت دے درمیان فرق سرکاری خزانے وچ جمع کرایا جاوے، جدکہ ایس توں حاصل ہون والا مالی فائدہ پیٹرول دی قیمت وچ کمی دی صورت وچ عوام تک پہنچایا جاوے۔
حکومت نے ریفائنریز نوں ہدایت کیتی اے کہ اگلے 30 دناں تک پیٹرول دی قیمت مقرر کرن وچ پریمیم، ہور اخراجات تے کسٹم ڈیوٹی دی سطح 7 مارچ 2026ء دے مطابق برقرار رکھی جاوے، جس نوں ایران تے امریکہ دی جنگ توں پہلاں دی بنیاد سمجھیا گیا اے۔
پیٹرولیم ڈویژن دے مطابق درآمدی قیمت تے ریفائنری قیمت وچ پیدا ہون والا فرق پیٹرولیم لیوی دی مد وچ قومی خزانے وچ جمع ہووے گا، تے اینی ہی رقم دے برابر ریلیف پیٹرول دی قیمت وچ کمی دے ذریعے صارفین نوں دِتا جاوے گا۔
