دہشتگردی دے سہولت کاراں وچ خیبر پختونخوا دی نااہل حکومت وی شامل سی: ترجمان پاک فوج

انسدادِ دہشتگردی وچ رکاوٹ پیدا کرن والا سہولت کار ہُن موجود نہیں، حکومت دی تبدیلی آئینی تے قانونی ضابطیاں دے مطابق ہوئی، بلوچستان وچ دہشتگرداں تے اشرافیہ دا گٹھ جوڑ، دونے صوبے دی ترقی دے مخالف: ڈی جی آئی ایس پی آر لیفٹیننٹ جنرل احمد شریف

اسلام آباد (خصوصی نیوز رپورٹر) ترجمان پاک فوج لیفٹیننٹ جنرل احمد شریف نے آکھیا اے کہ دہشتگردی دے سہولت کاراں وچ خیبر پختونخوا دی نااہل تے لاتعلق حکومت وی شامل سی، صوبے وچ اک ایسا سہولت کار جیہڑا انسدادِ دہشتگردی وچ رکاوٹ پیدا کر رہیا سی، اوہ ہُن اتھے موجود نہیں۔

عالمی خبر رساں ادارے رائٹرز نوں دتے گئے انٹرویو دیاں ہور تفصیلاں مطابق ڈی جی آئی ایس پی آر نے دہشتگردی دے خلاف کارروائیاں بارے واضح کیتا کہ ساڈے کول دہشتگردی نال نمٹن لئی اک واضح حکمتِ عملی موجود اے، جس دا اک حصہ پاکستان دے اندر دہشتگرداں تے انہاں دے سارے سہولت کاراں دا خاتمہ کرنا اے۔

ڈی جی آئی ایس پی آر نے آکھیا کہ دہشتگردی نال متعلق کجھ ایسے مسئلے وی نیں جنہاں نوں سانوں اندرونی طور اُتے سنبھالنا پئے گا۔ خیبر پختونخوا وچ کوئی وی شخص انسدادِ دہشتگردی دے آپریشنز دے خلاف نہیں اے، صرف اوہی لوک انسدادِ دہشتگردی دی مخالفت کردے نیں جنہاں دا انہاں دہشتگرداں نال گٹھ جوڑ اے۔

لیفٹیننٹ جنرل احمد شریف چوہدری نے آکھیا کہ خیبر پختونخوا وچ کسے وڈے فوجی آپریشن دی بجائے انٹیلی جنس بیسڈ آپریشن کیتے جا رہے نیں تے سکیورٹی فورسز روزانہ دی بنیاد اُتے تقریباً 200 انٹیلی جنس بیسڈ آپریشن کردیاں نیں۔ ایہہ آپریشن پولیس، فوج تے قانون نافذ کرن والے ہور ادارے آپسی تعاون نال کردے نیں۔

ڈی جی آئی ایس پی آر نے آکھیا کہ ساڈی سوچ بھارت ورگی نہیں کہ اسیں سارے اندرونی مسئلیاں نوں بیرونی قرار دیواں، تے اسیں ایہہ نہیں کہندے کہ پاکستان وچ ساری دہشتگردی صرف افغانستان دی وجہ توں اے، بلکہ افغانستان اوہ بنیادی اڈہ اے جتھوں پاکستان وچ دہشتگردی ہوندی اے، جتھے دہشتگرداں دی قیادت، انہاں دے تربیتی کیمپ تے لانچ پیڈز موجود نیں۔

لیفٹیننٹ جنرل احمد شریف چوہدری نے آکھیا کہ انسدادِ دہشتگردی دا اوہ تجربہ کسے وی ملک یا فوج کول نہیں، جیہڑا ساڈے کول گزشتہ 20 سال توں لڑائی کرن دی وجہ نال موجود اے۔ خیبر پختونخوا دے لوکاں نے ایس دہشتگردی دی وجہ توں سب توں ودھ مصیبتاں برداشت کیتیاں نیں۔

ڈی جی آئی ایس پی آر نے آکھیا کہ خیبر پختونخوا دے غیور عوام بہادر نیں تے پاکستانی معاشرے دا اک خاص حصہ نیں۔

پشتونواں توں بہتر کوئی لوک نہیں، اوہ اپنی روایات اُتے فخر کردے نیں۔ خیبر پختونخوا دے عوام امن تے استحکام دا مطالبہ کردے نیں تے اوہ ایس دے حقدار وی نیں۔

لیفٹیننٹ جنرل احمد شریف چوہدری دا کہنا سی کہ حکومت دے خاتمے بارے سوال اک سیاسی سوال اے، جس دا جواب سیاستدان ہی بہتر دے سکدے نیں، البتہ اسیں جو سمجھدے تے جانندے آں، اوہ ایہہ اے کہ حکومت دی تبدیلی آئینی تے قانونی ضابطیاں دے مطابق ہوئی سی۔

ڈی جی آئی ایس پی آر نے آکھیا کہ دہشتگرد اپنے آقائیاں دے اشاریاں اُتے بلوچستان دی ترقی تے ترقیاتی منصوبیاں نوں سبوتاژ کرن دی کوشش کر رہے نیں۔ بلوچستان وچ دہشتگرد نہ صرف مائننگ بلکہ ایل پی جی ٹرکاں، سکولاں تے استاداں اُتے وی حملے کردے نیں۔

انہاں آکھیا کہ دہشتگرد پُلاں تے ریلوے لائناں نوں وی تباہ کرن دی کوشش کردے نیں، تاں جو معاشی سرگرمیاں معطل ہو سکن۔ ہر اوہ چیز جیہڑی مقامی آبادی نوں روزگار تے معاشی طاقت فراہم کردی اے، دہشتگرد اُس نوں نشانہ بناؤندے نیں۔

لیفٹیننٹ جنرل احمد شریف چوہدری نے آکھیا کہ بلوچستان دی اشرافیہ عام عوام نوں غریب تے ان پڑھ رکھ کے اپنا اثر و رسوخ قائم رکھنا چاہندی اے۔ دہشتگرد تے اشرافیہ بلوچ عوام نوں غربت تے پسماندگی وچ رکھنا چاہندے نیں، تاں جو محرومی دا بیانیہ برقرار رہے۔ بلوچستان وچ دہشتگرداں تے اشرافیہ دا گٹھ جوڑ اے، کیوں جو دونے صوبے دی ترقی دے مخالف نیں۔