قرضیاں دی فراہمی وچ سستی اُتے بینکاں نال کوئی رعایت نہ برتی جائے: وزیراعظم
کساناں، چھوٹے تے درمیانے درجے دے کاروباراں تے وزیراعظم اپنا گھر سکیم لئی قرضیاں دی فراہمی پہلی ترجیح اے۔ جناح میڈیکل کمپلیکس دی تعمیر اُتے پیش رفت تسلی بخش، تمام تقرریاں شفاف طریقے نال کیتیاں جان: شہباز شریف
اسلام آباد (نامہ نگار) وزیراعظم شہباز شریف نے آکھیا اے کہ حکومتی اقدامات دے تحت کساناں، چھوٹے تے درمیانے درجے دے کاروباراں تے وزیراعظم اپنا گھر سکیم دے صارفین نوں قرضے فراہم کرن وچ سستی اختیار کرن والے بینکاں نال سٹیٹ بینک تے وزارتِ خزانہ کسے قسم دی کوئی رعایت نہ برتن۔ نجی شعبے دی ترقی لئی بینک کلیدی اہمیت دے حامل نیں۔
ترجیحی شعبیاں نوں قرضیاں دی فراہمی وچ سہولت بارے جائزہ اجلاس دی صدارت کردیاں وزیراعظم نے آکھیا کہ چھوٹے تے درمیانے درجے دے کاروباراں، ہاؤسنگ تے زراعت دی ترقی نال معیشت وچ بہتری لیانا تے نوجواناں نوں روزگار فراہم کرنا حکومت دی پہلی ترجیح اے۔
انہاں بینکاں دی کارکردگی قابلِ ستائش اے جیہڑے زراعت، ہاؤسنگ تے چھوٹے تے درمیانے درجے دے کاروباراں نوں حکومتی اقدامات دے تحت آسانی نال قرضے فراہم کر رہے نیں۔
وزیراعظم نے آکھیا کہ چھوٹے تے درمیانے درجے دے کاروبار معیشت دی ترقی، برآمدات دے فروغ تے روزگار دے مواقع پیدا کرن دی بھرپور صلاحیت رکھدے نیں۔ زراعت دا شعبہ ملکی معیشت دی ریڑھ دی ہڈی دی حیثیت رکھدا اے۔ زرعی اجناس دی ویلیو ایڈیشن دے ذریعے برآمدات وچ اضافہ کرن لئی کوششاں جاری نیں۔ اپنا گھر سکیم نال ہاؤسنگ تے تعمیرات دے شعبے نال جڑیاں کئی صنعتاں نوں فروغ ملے گا۔
وزیراعظم نے وزیرِ خزانہ نوں ایس ایم ای سیکٹر، زراعت تے ہاؤسنگ دے شعبیاں دے سٹیک ہولڈرز دے مالیاتی مسائل حل کرن تے جامع لائحہ عمل تیار کرن دی ہدایت کیتی۔ انہاں سٹیٹ بینک تے ایف بی آر نوں وی ہدایت کیتی کہ اوہ رل کے چھوٹے تے درمیانے درجے دے کاروباراں تے برآمدکنندگان دے ٹیکس نال متعلق مسئلے حل کرن، نال ہی چھوٹے تے درمیانے درجے دے کاروباراں نوں آسانی نال قرضے فراہم کرن لئی رسک کوریج دی جامع حکمتِ عملی وی تیار کیتی جائے۔
اسلام آباد وچ زیرِ تعمیر بین الاقوامی معیار دے ہسپتال، جناح میڈیکل کمپلیکس بارے جائزہ اجلاس دی صدارت کردیاں وزیراعظم نے آکھیا کہ جناح میڈیکل کمپلیکس اسلام آباد سمیت پورے پاکستان، خاص طور اُتے خیبر پختونخوا، آزاد جموں و کشمیر تے گلگت بلتستان دے مریضاں نوں علاج معالجے لئی جدید ترین سہولتاں فراہم کرے گا۔
انہاں آکھیا کہ جناح میڈیکل کمپلیکس دی تعمیر اُتے پیش رفت تسلی بخش اے، مقررہ مدت وچ اہداف حاصل کرنا یقینی بنایا جائے۔ جناح میڈیکل کمپلیکس وچ ساریاں تقرریاں میرٹ اُتے تے شفاف طریقے نال کیتیاں جان تے ادارے نوں چلاؤن لئی نجی ادارے دیاں خدمات حاصل کیتیاں جان۔ کمپلیکس وچ گھٹ آمدن والے تے متوسط طبقے نوں تشخیص دیاں جدید سہولتاں فراہم کیتیاں جان۔
اجلاس نوں دَسیا گیا کہ جناح میڈیکل اینڈ ریسرچ سینٹر دا مجموعی طور اُتے 59 فیصد کم مکمل ہو چکیا اے، جدکہ مرکزی ہسپتال تے پارکنگ پلازے دا بنیادی ڈھانچہ مکمل ہو چکیا اے۔ 403 بستراں اُتے مشتمل ایس منصوبے نوں 23 مارچ 2027 تک فعال کرن دا ہدف مقرر کیتا گیا اے۔
