سلائی دی تربیت دے بعد خواتین نوں ٹیکسٹائل دے شعبے وچ روزگار وی دِتا جائے گا: مریم نواز
1150 دیہاتی عورتاں ٹریننگ مکمل کرکے روزگار حاصل کر چکیاں، جون تک ہور 2500 عورتاں نوں تربیت دین دا ہدف مقرر۔ سڑکاں، مارکیٹاں تے منڈیاں وچ کوڑا سُٹن اُتے جرمانہ ہووے گا، ناقص صفائی اُتے سالڈ ویسٹ کمپنیاں ختم کرن بارے غور۔
لاہور (سٹاف رپورٹر) وزیراعلیٰ پنجاب مریم نواز شریف دا دیہاتی عورتاں لئی ٹیکسٹائل ٹریننگ دا ’’شی تھریڈ پروگرام‘‘ کامیابی نال جاری اے، جس دے تحت 1150 دیہاتی عورتاں ٹیکسٹائل دی تربیت مکمل کرکے روزگار حاصل کر چکیاں نیں۔ وزیراعلیٰ نے جون تک 2500 دیہاتی عورتاں نوں ٹیکسٹائل دی تربیت دین دا ہدف مقرر کیتا اے۔
مریم نواز شریف دی ہدایت اُتے پنڈاں دیاں عورتاں نوں ٹیکسٹائل دی تربیت دے نال ماہانہ 15 ہزار روپے وظیفہ وی دِتا جائے گا۔ شی تھریڈ ٹریننگ مکمل ہون توں بعد ٹیکسٹائل انڈسٹری وچ روزگار وی فراہم کیتا جائے گا۔
محکمہ ویمن ڈویلپمنٹ دے زیرِ اہتمام شی تھریڈ پروگرام دے تحت لاہور دے دیہی علاقیاں دیاں عورتاں دی رجسٹریشن شروع کر دتی گئی اے۔ ایس پروگرام وچ دیہاتی عورتاں نوں انڈسٹریل سلائی مشین آپریٹر تے اپیرل سپروائزر دی تربیت دتی جائے گی۔
لاہور دے نیڑے ملتان روڈ اُتے واقع شاہکام انڈسٹری وچ شی تھریڈ پروگرام دی ٹریننگ دا انتظام کیتا گیا اے۔ تین مہینے دے کورس وچ کلاس روم تدریس دے نال نال عملی تربیت وی دتی جائے گی۔ 18 توں 45 سال عمر دیاں عورتاں لئی پنجاب دی رہائشی یا ڈومیسائل ہون دی شرط رکھی گئی اے۔ شی تھریڈ پروگرام وچ رجسٹریشن لئی میٹرک پاس ہونا ضروری اے۔ پروگرام دے تحت عورتاں نوں مارکیٹ دی ضرورت مطابق ہنر سکھا کے ٹیکسٹائل انڈسٹری وچ روزگار وی دِتا جائے گا۔
دریں اثنا وزیراعلیٰ پنجاب نے صفائی دی صورتحال وچ 100 فیصد بہتری لیاؤن لئی 15 دناں دا ٹاسک دے دتا اے۔ وزیراعلیٰ دی زیرِ صدارت خصوصی اجلاس وچ ستھرا پنجاب دی کارکردگی دا جائزہ لیا گیا۔ اجلاس وچ ناقص صفائی اُتے سالڈ ویسٹ کمپنیاں ختم کرن بارے غور کیتا گیا۔
ایس موقع اُتے لاہور، فیصل آباد، گوجرانوالہ، ملتان تے ڈیرہ غازی خان وچ صفائی دے کم دا انتظام خود سنبھالن دا فیصلہ کیتا گیا۔ وزیراعلیٰ نے صوبے بھر دیاں سڑکاں اُتے گرد و غبار نظر آون اُتے تشویش دا اظہار کیتا تے مرکزی سڑکاں روزانہ دھون دا حکم دتا۔
انہاں صفائی توں بعد سڑکاں اُتے کوڑا کرکٹ سُٹن اُتے جرمانہ لاون دی ہدایت وی جاری کیتی۔ مارکیٹاں، بازاراں، سبزی، پھل تے غلہ منڈیاں وچ کوڑا کرکٹ سُٹن اُتے جرمانہ عائد کرن لئی اقدامات دا حکم دتا گیا۔
اجلاس وچ ہر ضلعے وچ افرادی قوت تے مشینری پوری کرن دا ہدف مقرر کیتا گیا۔ وزیراعلیٰ نے ہر دوجے دن پنڈاں دی صفائی یقینی بناؤن دی ہدایت کیتی۔ انہاں حکم دتا کہ ہر شہر تے ہر علاقے وچ ورکرز نوں تنخواہواں دی بروقت ادائیگی یقینی بنائی جائے۔
اجلاس وچ خالی پلاٹاں اُتے کوڑا کرکٹ نظر آون دی صورت وچ مالکان نوں جرمانہ کرن بارے وی غور کیتا گیا۔
علاوہ ازیں صحافیاں دے خلاف جرائم دے خاتمے دے عالمی دن اُتے خصوصی پیغام وچ وزیراعلیٰ نے آکھیا کہ صحافیاں نوں بلا خوف و خطر اپنے فرائض انجام دین لئی محفوظ ماحول فراہم کرنا ریاست دی ذمہ داری اے۔ صحافیاں دا تحفظ، آزادیٔ صحافت تے آزادیٔ اظہار جمہوری معاشرے دی بنیادی ضرورت نیں۔ صحافی معاشرے دیاں اکھاں تے کن نیں تے سچائی دے علمبردار نیں۔
