وکیل سلمان صفدر دی عمران خان نال ملاقات: نورین نیازی نوں اج دھیواں نال ملوان دا عدالتی حکم
بشریٰ بی بی نال 11 مہینے تے بانی نال 7 مہینے بعد ملاقات کروائی گئی، 40 منٹ دی گل بات لئی کافی نہیں سن: بیرسٹر سلمان، لاہور ہائیکورٹ وچ ڈی سی لاہور کل طلب، حسان نیازی دی ملٹری کورٹ کارروائی خلاف درخواست اُتے وی سماعت
راولپنڈی، اسلام آباد (احمد بھٹی، مانیٹرنگ ڈیسک) اڈیالہ جیل وچ قید بانی پی ٹی آئی تے انہاں دی اہلیہ بشریٰ بی بی نال انہاں دے وکیل بیرسٹر سلمان صفدر دی گزشتہ روز ملاقات کروا دتی گئی۔ ایس حوالے نال بیرسٹر سلمان صفدر نے ایکس اُتے اپنی ٹویٹ وچ آکھیا کہ اڈیالہ جیل حکام نے گزشتہ روز سوموار دی شام ساڑھے چار وجے میری بانی پی ٹی آئی تے بشریٰ بی بی نال ملاقات کروائی۔ ملاقات دا دورانیہ 40 منٹ سی۔ بار بار درخواستاں دین توں بعد 7 مہینے بعد بانی پی ٹی آئی، جدکہ 11 مہینے بعد بشریٰ بی بی نال ملاقات کروائی گئی۔
ملاقات دوران سارے مقدماں تے قانونی معاملیاں اُتے گل بات لئی وقت کافی نہیں سی۔ بانی پی ٹی آئی تے بشریٰ بی بی نے اپنی صحت تے جیل وچ رہائش دے حالات بارے آگاہ کیتا۔ بانی پی ٹی آئی تے بشریٰ بی بی نے کجھ مقدماں تے قانونی معاملیاں بارے نویاں ہدایتاں وی دتیاں۔ ذرائع دے مطابق ایہ ملاقات 190 ملین پاؤنڈ ریفرنس وچ بانی تے بشریٰ بی بی نوں سنائیاں گئیاں سزاؤں خلاف اپیل دے تناظر وچ کیتی گئی۔ میاں بیوی نے اپنی اپیلاں بارے ہدایتاں دتیاں۔
لاہور (کورٹ رپورٹر) لاہور ہائیکورٹ نے بانی پی ٹی آئی دیاں بھیناں دی نظر بندی دے نوٹیفکیشن وچ توسیع خلاف دائر درخواست اُتے سماعت کیتی تے نورین نیازی دیاں دوناں دھیواں نال اج منگل نوں جیل وچ سویرے 10 وجے اک گھنٹے دی ملاقات کرواؤن دا حکم دے دتا۔
جسٹس عبہر گل خان نے سکینہ تے شاہ ریز دی درخواست اُتے سماعت کیتی۔ عدالتی حکم اُتے ہوم سیکرٹری نے رپورٹ پیش کیتی۔ پنجاب حکومت دے وکیل نے دسیا کہ نورین نیازی دا ہسپتال وچ علاج کروایا گیا تے انہاں نوں دوبارہ جیل منتقل کر دتا گیا اے۔ علاج دوران 29 اکتوبر نوں حاجرہ نیازی دی اپنی والدہ نال ملاقات کروائی جا چکی اے۔
عدالت نے آکھیا کہ دوناں دھیواں دی اپنی والدہ نال اک گھنٹے دی ملاقات کروائی جائے تے درخواست گزار دا وکیل ملاقات بارے ڈی سی لاہور نوں درخواست دے۔ عدالت نے نورین نیازی تے عظمیٰ خانم دی نظر بندی دے نوٹیفکیشن وچ توسیع بارے ڈی سی لاہور نوں ذاتی حیثیت وچ کل 4 نومبر نوں طلب کر لیا، جدکہ نظر بندی وچ توسیع خلاف درخواست دی سماعت اگلے ہفتے تک ملتوی کر دتی گئی۔
دوجے پاسے لاہور ہائیکورٹ دے جسٹس شہرام سرور چوہدری دی سربراہی وچ دو رکنی بینچ نے پی ٹی آئی رہنما حسان نیازی دی ملٹری کورٹ دی ساری کارروائی خلاف درخواست اُتے سماعت کیتی۔ سپیشل پراسیکیوٹر نے جواب جمع کروا دتا، جس وچ مؤقف اختیار کیتا گیا کہ حسان نیازی دی درخواست لاہور ہائیکورٹ وچ قابلِ سماعت اے، تاہم بہتر ہووے گا کہ درخواست گزار اسلام آباد ہائیکورٹ نال رجوع کرن۔ عدالت نے درخواست گزار دے وکیل نوں جواب الجواب تین ہفتیاں اندر جمع کرواؤن دا حکم دے دتا۔
