جعلی دوائیاں دیاں منڈیاں تک رسائی حکومتی ناکامی دا ثبوت اے: حلیم عادل
ملک بھر دیاں دوائیاں دیاں منڈیاں، فارمیسیاں، گوداماں تے سپلائی چین دی جانچ کیتی جائے، جعلی دوائیاں دی فروخت تے ترسیل وچ ملوث عناصر نوں گرفتار کیتا جائے تے ذمہ دار حکام دا احتساب کیتا جائے۔
کراچی (سٹاف رپورٹر) صدر پی ٹی آئی سندھ حلیم عادل شیخ نے ملک بھر وچ جعلی دوائیاں تے فلو ویکسین دی فروخت اُتے تشویش دا اظہار کردے ہوئے آکھیا اے کہ جعلی دوائیاں دی منڈیاں تے فارمیسیاں تک رسائی حکومتی نگرانی دے نظام دی ناکامی دا واضح ثبوت اے۔
انہاں آکھیا کہ کراچی وچ 15 دوائیاں تے طبی مصنوعات، جدکہ سندھ وچ 6 دوائیاں دے 7 بیچ جعلی، غیر معیاری یا غیر رجسٹرڈ قرار دتے گئے نیں، جیہڑی انتہائی تشویشناک گل اے۔
حلیم عادل شیخ نے ہور آکھیا کہ عالمی دوا ساز کمپنیواں دے ناں ورت کے جعلی ویکسیناں فروخت کیتیاں جا رہیاں نیں۔ کجھ ویکسیناں دے بیچ پاکستان وچ درآمد یا تقسیم ہی نہیں کیتے گئے، جدکہ کجھ مستند سپلائی چین دا حصہ نہیں سن۔
انہاں آکھیا کہ جعلی دوائیاں وچ جان بچاؤن والیاں دوائیاں، اکھاں تے کنّاں دیاں دوائیاں تے بچیاں دی دیکھ بھال نال متعلق مصنوعات وی شامل نیں۔ حکومت دسّے کہ جعلی دوائیاں تے ویکسیناں منڈیاں، فارمیسیاں تے آن لائن ذرائع تک کِویں پہنچیاں۔
انہاں مطالبہ کیتا کہ ملک بھر وچ دوائیاں دیاں منڈیاں، فارمیسیاں، گوداماں تے سپلائی چین دی جانچ کیتی جائے، جعلی دوائیاں دے بیچ ضبط کرکے انہاں دی فروخت تے ترسیل وچ ملوث عناصر نوں گرفتار کیتا جائے تے ذمہ دار حکام دا وی احتساب کیتا جائے۔
