ابتدائی بیان قلمبند ہون توں بعد استغاثہ اپنا گواہ واپس نہیں لے سکدا: سپریم کورٹ
ایس مرحلے اُتے ملزم دا جرح کرن دا حق قانونی طور اُتے قائم ہو جاندا اے: عدالت، قتل دے مجرماں دیاں درخواستاں مسترد، عمر قید دی سزا برقرار، اک ملزم خلاف جرم ثابت ہون اُتے دوجے نوں سزا نہیں دتی جا سکدی، اک پرا دی عمر قید برقرار، دوجا بری، چرس دا ملزم رہا
اسلام آباد سپریم کورٹ نے قرار دتا اے کہ کسے گواہ دا ابتدائی بیان قلمبند ہون توں بعد استغاثہ اوہنوں دستبردار نہیں کر سکدا، کیوں جو ایس مرحلے اُتے ملزم دا جرح کرن دا حق قانونی طور اُتے قائم ہو جاندا اے۔ عدالت نے قتل دے ملزماں دیاں درخواستاں مسترد کردیاں ٹرائل کورٹ تے ہائیکورٹ دے فیصلے برقرار رکھے، جدکہ 48 کلو چرس دے ملزم نوں بری کرن دا حکم دے دتا۔
اک ہور مقدمے وچ عدالت نے قرار دتا کہ اک ملزم خلاف جرم ثابت ہون اُتے دوجے ملزم نوں سزا نہیں دتی جا سکدی۔ عدالت نے اک پرا دی عمر قید دی سزا برقرار رکھی تے دوجے نوں شک دا فائدہ دیندے ہوئے بری کر دتا۔
سپریم کورٹ دے جسٹس ہاشم خان کاکڑ، جسٹس صلاح الدین پنہور تے جسٹس اشتیاق ابراہیم اُتے مشتمل تین رکنی بینچ نے قتل دے مقدمے وچ ملزماں قیصر محمود تے اشتیاق احمد دیاں درخواستاں مسترد کردیاں ٹرائل کورٹ تے لاہور ہائیکورٹ دے فیصلے برقرار رکھے۔
اپنے تفصیلی تحریری فیصلے وچ عدالت نے قرار دتا کہ گواہ نوں عدالت وچ پیش ہون توں پہلاں یا بیان شروع ہون توں پہلاں دستبردار کیتا جا سکدا اے، پر ابتدائی بیان دا اک لفظ وی قلمبند ہون توں بعد استغاثہ اپنی مرضی نال اوہنوں دستبردار نہیں کر سکدا۔
ایس مرحلے اُتے مخالف فریق نوں جرح دا مکمل قانونی حق حاصل ہو جاندا اے۔ سپریم کورٹ نے مقتول دی اہلیہ مسرت بی بی نوں ابتدائی بیان قلمبند ہون توں بعد دستبردار کرن دے عمل اُتے سخت ناپسندیدگی دا اظہار کیتا۔ عدالت نے درخواستاں مسترد کردیاں ملزم دی عمر قید دی سزا برقرار رکھی۔
مزید برآں سپریم کورٹ دے جسٹس اشتیاق ابراہیم ولوں لکھے گئے فیصلے مطابق، اک ملزم خلاف جرم ثابت ہون دی بنیاد اُتے دوجے ملزم نوں سزا نہیں دتی جا سکدی۔ فوجداری مقدمیاں وچ ہر ملزم خلاف ثبوتاں دا وکھ وکھ جائزہ لینا ضروری اے۔
عدالت نے قتل دے مقدمے وچ دو پراواں وچوں اک ملزم شہریار نوں شک دا فائدہ دیندے ہوئے بری کر دتا، جدکہ دوجے ملزم اسفندیار دی عمر قید دی سزا برقرار رکھی۔
سپریم کورٹ دے تین رکنی بینچ نے 48 کلوگرام چرس برآمدگی دے مقدمے وچ ماتحت عدالتاں دے فیصلے کالعدم قرار دیندے ہوئے تیمور خان نوں بری کرن دا حکم دتا۔
ایس دوران سپریم کورٹ نے اچانک جھگڑے دوران اپنے پرا دا قتل کرن دے مقدمے وچ ملزم ابو ہریرہ دی عمر قید دی سزا 14 سال قید وچ تبدیل کر دتی۔
جسٹس محمد علی مظہر تے جسٹس عرفان سعادت خان اُتے مشتمل سپریم کورٹ دے دو رکنی بینچ نے حیدرآباد وچ پیٹرول پمپ دی ڈیلرشپ تے وراثتی حصیاں دے تنازع نال متعلق مقدمے وچ ایہ قانونی اصول واضح کیتا کہ محض کسے فریق دے مطالبے اُتے ریسیور مقرر نہیں کیتا جا سکدا۔
سپریم کورٹ نے آبزرویشن دتی کہ اپیلیٹ کورٹ دے سامنے بنیادی سوال صرف ایہ سی کہ آیا ٹرائل کورٹ نے عارضی حکمِ امتناع دی درخواست مسترد کر کے درست فیصلہ کیتا سی یا نہیں، پر ہائیکورٹ نے ریسیور مقرر کر دتا۔
سپریم کورٹ نے نجی ہسپتال وچ جڑواں بچیاں دی پیدائش دوران خاتون دی موت اُتے ڈاکٹراں خلاف کارروائی دی درخواست وی خارج کر دتی۔
