لیوی بارے حکومت تے جماعت اسلامی دا مشاورت جاری رکھن اُتے اتفاق
معاشی چیلنجز اُتے سیاسی جماعتاں وچ مسلسل مکالمے دی لوڑ اے: اسحاق ڈار
اسلام آباد (اپنے رپورٹر توں، دنیا نیوز، وقائع نگار) پٹرولیم لیوی، قیمتاں وچ کمی تے عوامی ریلیف بارے حکومت تے جماعت اسلامی دے مذاکرات وچ عوام نوں ریلیف فراہم کرن دے اقدامات اُتے تفصیلی غور کیتا گیا۔
حکومتی وفد وچ نائب وزیراعظم تے وزیر خارجہ سینیٹر محمد اسحاق ڈار، وفاقی وزیر احسن اقبال تے رانا ثنا اللہ شامل سن، جدکہ جماعت اسلامی دے وفد وچ قائم مقام امیر لیاقت بلوچ، ڈپٹی سیکرٹری سید فراست شاہ، امیر اسلام آباد نصراللہ رندھاوا تے سیکرٹری اطلاعات شکیل احمد ترابی شامل سن۔
ترجمان دفتر خارجہ مطابق ملاقات دوران دوناں دھراں نے توانائی دیاں قیمتاں تے عوامی ریلیف بارے مشاورت دا سلسلہ جاری رکھن اُتے اتفاق کیتا۔
ایس موقع اُتے نائب وزیراعظم اسحاق ڈار نے عوامی فلاح و بہبود نوں ترجیح دین تے عام شہریاں نوں سہولتاں فراہم کرن دے حکومتی عزم دا اعادہ کیتا۔
اسحاق ڈار نے مزید آکھیا کہ قومی معاشی چیلنجز نال نمٹن لئی ساریاں سیاسی جماعتاں وچ مسلسل مکالمہ تے مشاورت بڑی اہمیت رکھدی اے۔
بعد وچ پریس کانفرنس کردیاں لیاقت بلوچ نے آکھیا کہ حکومت تے جماعت اسلامی دے مذاکرات حتمی مرحلے وچ داخل ہو گئے نیں۔ دوناں دھراں نے پٹرولیم لیوی دا خاتمہ ضروری قرار دتا اے۔
جماعت اسلامی نے عوام نوں ریلیف دین لئی حکومت نوں چھ تجاویز پیش کیتیاں سن، جنہاں وچ پٹرولیم لیوی دا خاتمہ، ریلیف پیکیج، پبلک ٹرانسپورٹ، 800 سی سی توں وڈیاں گاڑیاں تے زرعی شعبے نوں ریلیف دینا شامل سی۔
حکومت نے زرعی شعبے تے 1000 سی سی گاڑیاں نوں ریلیف دین اُتے اتفاق کیتا اے۔
لیاقت بلوچ نے آکھیا کہ حکمران اپنی مراعات چھڈن لئی تیار نہیں، آئل ریفائنریاں نوں بے تحاشا منافع کمان دے موقعے دتے گئے نیں، حکومت کول لیوی برقرار رکھن دا کوئی ٹھوس جواز نہیں۔
