خیبر پختونخوا وچ ٹرانسفارمر بیسڈ لوڈ مینجمنٹ سسٹم لاگو کرن دا فیصلہ
خودکار نظام دے تحت پورے فیڈر دی بجلی بند کرن دا سلسلہ ختم ہو جائے گا، وفاقی وزیر توانائی، مسئلے حل کرن لئی مشاورتی اجلاس، وفاقی حکومت بجلی دی فراہمی دا دورانیہ ودھاؤن اُتے تیار
اسلام آباد (نامہ نگار) وزیراعظم شہباز شریف دی خصوصی ہدایت اُتے خیبر پختونخوا وچ بجلی تے توانائی دے درپیش مسئلیاں دے پائیدار حل لئی اک اہم مشاورتی اجلاس ہویا۔ اجلاس وچ وفاقی وزیر توانائی سردار اویس لغاری تے وفاقی وزیر پٹرولیم نے خیبر پختونخوا دے توانائی نال جڑے چیلنجز اُتے تفصیلی تبادلہ خیال کیتا۔
اجلاس دا مقصد وزیراعظم دے وژن دے تحت صوبائی انتظامیہ دے نال مل کے توانائی دے نظام وچ بہتری لیانا تے عوام لئی آسانیاں پیدا کرنا سی۔
سردار اویس احمد خان لغاری نے واضح کیتا کہ خیبر پختونخوا وچ ٹرانسفارمر بیسڈ لوڈ مینجمنٹ سسٹم (اے پی ایم ایس) لاگو کیتا جا رہیا اے۔ ایس جدید تے خودکار نظام دے تحت روایتی طریقے نال پورے فیڈر دی بجلی بند کرن دا سلسلہ ختم ہو جائے گا تے ٹرانسفارمراں اُتے لوڈ مینجمنٹ کیتی جائے گی۔
اجلاس وچ گورنر فیصل کریم کنڈی، سیکرٹری پاور ڈویژن، سیکرٹری پٹرولیم، وزیراعظم دے معاونِ خصوصی برائے توانائی تے چیف سیکرٹری خیبر پختونخوا نے شرکت کیتی۔
اجلاس دوران گورنر خیبر پختونخوا فیصل کریم کنڈی نے صوبے وچ توانائی دی مجموعی صورتحال اُتے گل کردیاں آکھیا کہ بجلی دی لوڈشیڈنگ دا دورانیہ گھٹ توں گھٹ کیتا جائے۔
وفاقی وزیر اویس احمد خان لغاری نے عوامی ریلیف نوں ترجیح دیندیاں خیرسگالی دے طور اُتے ایس گل اُتے آمادگی ظاہر کیتی کہ زیادہ نقصانات والے علاقے، جتھے لمبی لوڈشیڈنگ کیتی جا رہی سی، اُتھے لوڈشیڈنگ گھٹا کے بجلی دی فراہمی دا دورانیہ ودھایا جائے گا۔
وفاقی قیادت نے امید ظاہر کیتی کہ عوام حکومتی اقدام تے اعتماد دا مثبت جواب دین گے۔
اجلاس دے اختتام اُتے وفاقی حکومت تے صوبائی قیادت نے ایس گل اُتے مکمل اتفاق کیتا کہ باہمی رابطے مضبوط کیتے جان گے، تاں جو طے شدہ لائحہ عمل اُتے عملدرآمد کرکے خیبر پختونخوا دے شہریاں لئی فوری تے پائیدار ریلیف یقینی بنایا جا سکے۔
