سعودی عرب پاکستان توں زرعی مصنوعات دی درآمد ودھاؤن اُتے آمادہ
باسمتی چاول، حلال گوشت، لائیوسٹاک مصنوعات تے سبز چارے دیاں برآمدات ودھاؤن اُتے زور
اسلام آباد (نامہ نگار) وفاقی وزیر برائے قومی غذائی تحفظ تے تحقیق رانا تنویر حسین نے پاکستان وچ سعودی عرب دے سفیر ڈاکٹر راجح تامی البقمی نال اعلیٰ سطح دا اجلاس کیتا، جس وچ زراعت، لائیوسٹاک، تجارت تے سرمایہ کاری دے شعبیاں وچ دوطرفہ تعاون نوں ہور مضبوط بناؤن دے امکانات دا جائزہ لیا گیا۔
دونیں پاسیاں ولوں ایس عزم دا اظہار کیتا گیا کہ مضبوط سیاسی تعلقات نوں عملی معاشی تے زرعی تعاون وچ تبدیل کیتا جائے گا۔
اجلاس وچ سعودی وزیر زراعت دے حالیہ دورے توں بعد ہون والی پیش رفت تے باہمی تعاون دے شعبیاں وچ پیش رفت لئی قائم کیتی گئی مشترکہ تکنیکی ٹیم دے معاملات اُتے وی تبادلہ خیال کیتا گیا۔
وفاقی وزیر نے سعودی عرب نوں پاکستان دیاں زرعی برآمدات ودھاؤن دے عزم دا اظہار کردیاں باسمتی چاول، حلال گوشت، لائیوسٹاک مصنوعات تے سبز چارے دیاں برآمدات وچ اضافہ کرن اُتے زور دتا۔
سعودی سفیر نے پاکستانی زرعی مصنوعات دیاں درآمدات ودھاؤن لئی اپنے ملک دی آمادگی دا اظہار کیتا۔
دونیں پاسیاں نے اتفاق کیتا کہ قائم کیتے گئے مشترکہ تکنیکی نظام نوں مؤثر طریقے نال استعمال کردیاں تجارتی تے ضابطہ جاتی رکاوٹاں دور کیتیاں جان گیاں تے باہمی تعاون دے طے شدہ شعبیاں وچ پیش رفت نوں تیز کیتا جائے گا۔
