وزیراعلیٰ دا والہانہ استقبال، پھلاں دی ورکھا، روایتی ڈاچی ناچ تے منصوبیاں دا افتتاح
لاہور (سٹاف رپورٹر) وزیراعلیٰ پنجاب مریم نواز شریف دے اٹک پہنچن اُتے عوام دے وڈے ہجوم نے کارکنان تے بچیاں دے نال اُنہاں دا پُرتپاک استقبال کیتا۔ وزیراعلیٰ دی آمد اُتے ہر چوک وچ روایتی ڈاچی ناچ نال استقبال کیتا گیا تے ہر چوراہے تے سڑک اُتے پھلاں دی ورکھا کیتی گئی۔
ہٹیاں روڈ، کامرہ روڈ تے یونیورسٹی روڈ اُتے وزیراعلیٰ مریم نواز شریف دی گاڑی گلاب دیاں پتیّاں نال بھر گئی۔ وزیراعلیٰ نے سکیورٹی ہٹا کے عوام تے بچیاں نوں اپنے کول بلا لیا۔
اُنہاں بچیاں دے نال اٹک دے میگا پراجیکٹس تے 23 ارب روپے دی لاگت نال تیار ہون والے 59 سڑکاں دے منصوبیاں دا باقاعدہ افتتاح کیتا۔ ایگری مال، اراضی ریکارڈ سنٹر، ماڈل چلڈرن ہوم، فتح جنگ سپیشل ایجوکیشن سنٹر سمیت 127 منصوبیاں دا افتتاح وی کیتا گیا۔
اٹک وچ فتح جنگ پنڈی گھیب روڈ، ڈھوک لاہم توں جھمات روڈ، مٹھیال چوک توں ڈھوک پٹھان تے ہور سڑکاں دے منصوبیاں دا وی افتتاح کر دتا گیا۔ وزیراعلیٰ نے اٹک لئی گرین بس پراجیکٹ دا باقاعدہ آغاز وی کر دتا۔
