ای سی سی: دفاعی ضروریات لئی 54 ارب، آبی شعبے لئی 275 ارب روپے منظور، کیمرے نصب سمارٹ عینکاں دی درآمد اُتے پابندی
کھاد کارخانیاں نوں 31 دسمبر تک گیس دی فراہمی جاری رکھن، 89 پٹرولیم رائٹس دی توسیع تے تجدید دے قاعدیاں وچ نرمی دی منظوری، کفایت شعاری نال بچائے گئے 15 ارب 62 کروڑ روپے وزیراعظم فنڈ وچ منتقل، گیس فیلڈز دے نیڑے پنڈاں لئی اک ارب روپے منظور
اسلام آباد (مدثر علی رانا) وزیر خزانہ محمد اورنگزیب دی صدارت وچ اقتصادی رابطہ کمیٹی (ای سی سی) دے اجلاس وچ 11 نکاتی ایجنڈے اُتے غور کیتا گیا۔ اجلاس وچ کیمرے نصب سمارٹ عینکاں دی درآمد اُتے پابندی دی منظوری دے دتی گئی، جدکہ صوبائی حکومتاں تے اسلام آباد انتظامیہ نوں انہاں دے استعمال بارے ضابطے تیار کرن دی سفارش کیتی گئی۔
ای سی سی نے دفاعی ضروریات لئی 54 ارب روپے دی تکنیکی ضمنی گرانٹ منظور کر لئی۔ ایس وچ لینئج ایل 1000 طیارے دی شمولیت لئی اک ارب 9 کروڑ 40 لاکھ روپے تے پراجیکٹ استقلال لئی 29 ارب 13 کروڑ 90 لاکھ روپے شامل نیں۔ فرنٹیئر کور بلوچستان نارتھ دے ہیلی کاپٹر دی مرمت لئی 37 لاکھ 10 ہزار روپے دی گرانٹ وی منظور کیتی گئی۔
اجلاس وچ وزیراعظم یوتھ بزنس اینڈ ایگریکلچر لون سکیم دے قرضیاں دے مختلف درجیاں تے شرحِ سود وچ تبدیلی دی منظوری دتی گئی۔ کفایت شعاری تے ایندھن دی بچت دے اقدامات نال حاصل ہون والے 15 ارب 62 کروڑ 50 لاکھ روپے وزیراعظم کفایت شعاری فنڈ 2026ء وچ منتقل کرن دا فیصلہ کیتا گیا۔
ای سی سی نے آبی شعبے دے اہم منصوبیاں لئی 275 ارب روپے دی تکنیکی ضمنی گرانٹ وی منظور کر لئی۔ اجلاس وچ فاطمہ فرٹیلائزر تے ایگری ٹیک کھاد کارخانیاں نوں 31 دسمبر 2026ء تک گیس دی فراہمی جاری رکھن دی منظوری دتی گئی، تاہم ایہہ فراہمی گیس دی دستیابی نال مشروط ہووے گی۔
کمیٹی نے 89 پٹرولیم رائٹس دی توسیع تے تجدید لئی ایکسپلوریشن اینڈ پروڈکشن قواعد وچ نرمی دی منظوری دتی۔ ایس توں علاوہ گیس پیدا کرن والے فیلڈز دے پنج کلومیٹر دے اندر واقع پنڈاں نوں گیس فراہم کرن لئی اک ارب روپے دی گرانٹ منظور کیتی گئی۔ ایہہ رقم رواں مالی سال 2027ء دوران نیڑے دے پنڈاں وچ گیس دے بنیادی ڈھانچے دی ترقی اُتے خرچ ہووے گی۔
وزیر خزانہ محمد اورنگزیب نے پاکستان دی جی 24 چیئرمین شپ لئی ترجیحات دا اعلان کردیاں آکھیا کہ پاکستان اُبھردیاں معیشتاں تے ترقی پذیر ملکاں دے اجتماعی مفادات دے تحفظ لئی بھرپور کردار ادا کرے گا۔ پاکستان نے یکم نومبر 2026ء نوں انٹرگورنمنٹل گروپ آف ٹوئنٹی فور (جی 24) دی چیئرمین شپ سنبھالی اے۔
جی 24 سیکرٹریٹ دی ڈائریکٹر ڈاکٹر ایابو ماشا نے وزیر خزانہ نوں ورچوئل بریفنگ دوران گروپ دے ادارہ جاتی ڈھانچے، جاری پالیسی تے تحقیقی ایجنڈے تے عالمی مالیاتی اداریاں نال رابطیاں بارے آگاہ کیتا۔
